Nome: Flávio Soares Natureza
Classe: 2o ano de Filosofia
Foi corrigido pelo: Pe. Waldimiro Afonso Viana (Docente ISFIT)
Uluk-nanain, desejo ha’u ninia profunda gratidão ba Aman Maromak, heróis da pátria no rai lulik Timor. Hakarak mos sauda no parabeniza povo Timor tomak iha loron histórico no determinante ida ne’e. Ao mesmo tempo hato’o mos sentido condolência ba herói, heroína da pátria sira nebé mate. Profunda homenagem ba sobrevivente sira hotu. Ha’u hahú reflexão ne’e ho eis comandante região IV Sr. Hernesto Fernandes “Dudu”, nia liafuan nebé dehan “Ha’u luta hodi liberta povo no rai ida ne’e hosi opressão no ocupação mai kedas hosi hun ida, ha’u foti kilat hodi hasoru inimigo sira la’os ação espontânea ida, princípio kaer rasik kuda talin mak ha’u continua de’it[1]”. Timor-Leste ohin hamriik ona nu’udar país independente ho tinan 22. No comemoração loron consulta popular tama ona ba 25 anos ka bodas de prata. Ida ne’e nu’udar memória inesquecível iha Timoroan hotu nia hanoin.
Nu’udar geração foun curioso tebes atu hatene história nune’e iha ocasião ida ne’e, ha’u hola iniciativa atu fahe hamutuk ho ita boot sira reflexão simples kona-ba loron consulta popular nian. Objetivo ida seluk mos oinsá atu hamoris espírito nu’udar geração continuadora ba rai ida ne’e. Iha expressão popular ida nebé ita sempre rona no temi katak: joven nebé la hatene nia história hanesan ai nebé la iha abut. Hanesan mos Dr. Domingos Sousa preocupa katak nia ta’uk timoroan sira monu ba ‘‘Acto de esquecimento’’[2]. Ba nia história rasik.
Iha reflexão ne’e, ha’u hakarak tebes atu lori ita ba reflete kona-ba história loron consulta popular nebé sai nu’udar resumo hosi luta povo nian nebé lori tempo naruk. Molok to’o iha momento ida ne’e ema barak mak sacrifica sira nia vida.
Molok refleta kle’an kona-ba ne’e, atan ha’u hakarak sistematiza ba pontos tolu:
- Independência nu’udar visão comum Timoroan tomak nian hodi sustenta espírito patriotismo no nacionalismo.
- Contexto histórico loron consulta popular nu’udar momento determinante ba ukun rasik-an, no
- Lição saida mak geração foun precisa banati tuir hodi continua luta ba desenvolvimento rai doben Timor-Leste.
- Independência nu’udar visão comum Timoroan tomak nian hodi sustenta espírito patriotismo no nacionalismo
Ukun rasik-an nu’udar visão ida nebé metin ona iha hanoin lulik no fuan santo Timoroan sira nian desde beiala sira nia tempo. Nu’udar comandante Nicolau dos Reis Lobato afirma: “A ideia de liberdade, o desejo da independência nasce com o povo, vive com o povo e pulsa todos os dias no coração do povo[3]”. Mesmo que sira la iha curso acadêmico nebé aas maibé sira iha visão clara Timor nia futuro. Timor precisa ema nebé hatene fo-an ka sacrifica-an ho domin atu liberta povo no nação hosi opressão dos inimigos. Ho vontade popular ne’e mak saudoso comandante Nicolau Lobato hatutan tan katak: “Nós sabemos, podemos e devemos vencer[4]”.
Perante peregrinação dolorosa ne’e, Timoroan rihun ba rihun, atus ba atus mak sacrifica ona sira nia vida hodi luta to’o hetan ukun rasik-an. Iha processo luta ne’e barak mak mate, no ohin loron barak mak faluk, oan kiak, moras mental no balun ruin buka la hetan. Nune’e, ukun rasik-an ida ne’e la’os presente nebé ema ida mak fo eh la’os kalan toba mehi dader sai realidade. Maibé Timor nia ukun rasik-an ida ne’e sosa-troca-selu-sulan-taka ho ruin no ran[5].
Loos duni katak povo Timor liliu jovem sira uluk ninia domin ba rai ida ne’e boot teb-tebes compara ho domin ba sira nia-an rasik. Ha’u empresta saudoso Sr. Fernando “Lasama” nia liafuan nebé dehan; “ha’u nia dignidade la aas liu dignidade nação nian”. Sentimento ida ne’e metin iha povo maubere nia fuan laran no lori ba ação kmook mak fo-an ba mate tamba independência. Hanesan Aristóteles afirma “A ação é a melhor prova dos princípios humanos, portanto ação supõe a liberdade o implica a ultrapassagem da ordem na natureza humana”[6]. Loos duni ação mak prova princípio moris indivíduo ida nian. Tan interesse ba bem comun aas liu mak ikus mai nia tenki hamate nia liberdade rasik. Ko’alia kona-ba patriotismo significa ko’alia kona-ba o amor próprio pela sua pátria ka indivíduo ida nia domin ba nia pátria rasik. Sentido ida ne’e mak mosu espírito nacionalismo basá princípio unidade nacional sai ona comunhão ida herói no heroína sira nian iha luta. Abnegação mak domin nebé exige pessoa ida nega-an rasik hodi fo valor ba ema seluk nia felicidade. Kona-ba felicidade Aristóteles define buat rua ‘‘Teoris ( domin ba ciência) no Praxis (domin ba maun-alin sira)’’[7]. Domin Praxis ida ne’e mak ita nia ema sira uluk nian hatudu ona. Abnegação ne’e exige ema sai hosi nia-an rasik (desejo carnal), tamba de’it interesse ema hotu nian ka Aristóteles hanaran bem comum. Juventude loriku aswain sira nem interesse atu goza liderdade ne’e, ho idade nebé produtivo iha áreas oioin hanesan educação, desporto, música nsst. Sira hanoin de’it mak ukun rasik-an. Factos hatudu ho princípio nebé baibain ita rona mak “mate ka moris timor ukun rasik-an”.
- Consulta popular nu’udar momento determinante ba ukun rasik-an
Iha parte ida ne’e, ita haré pontos importantes balun nebé marca história hodi determina destino Timor nian.
Durante quarto séculos, Timor hetan colonialização hosi Portugal. Ho revolução dos cravos iha 25 de abril de 1974, regime Marcelo Caetano nian monu no Portugal hahú fo possibilidade ba país colonializado sira atu decide rasik sira nia destino, inclui Timor. Nune’e aprova legislação ida iha julho de 1975 iha Lisboa mak prévia ona formação de um governo de transição. No transição ida ne’e grau la ba independência to’o outubro 1978. Tamba ne’e, Timoroan sira hahú forma ona partidos políticos. Nu’udar base preparação nian ba autoderminação. Infelizmente iha tinan 1975, mosu ideias contraditórias entre Timoroan sira pró-independentistas no defensores da integração ba Indonésia mak hamosu Guerra civil. Iha 28 de novembro de 1975, Frente Revolucionária de Timor-Leste Independente (FRETILIN) proclama independência Timor-Leste nian. Maibé depois de tinan rua (1977), coligação partidos pró-Indonésia composta essencialmente hosi União Democrática Timorense (UDT) no Associação Popular Democrática (APODETI), mos proclama integração Timor ba Indonésia[8].
Nune’e iha dia 7 de dezembro de 1975, Indonésia hetan apóio hosi aliado sira invade Timor hosi lalehan, tasi no rai maran. Invasão ida ne’e hetan condenação hosi Organização das Nações Unidas (ONU) iha 22 de dezembro de 1975. Conselho segurança ONU nian, aprova resolução por humanidade, resolução 348, nebé reconhece direito inalienável povo Timor nian ba autodeterminação. ONU mos lamenta ho Portugal nebé la cumpre plenamente ninia responsabilidade nu’udar potência administrante do território. Iha 17 de julho de 1976, presidente Soeharto promulga lei 7/76, nebé estabelece integração Timor ba Indonésia hanesan nia província ba dala 27. Até outubro 1976, Indonésia mantém ho decisão ida ne’e maibé ONU la reconhece.
Durante ocupação Indonésia nian tuir dados nebé registrado entre tinan 1975-1980, cerca de 100 000 timorenses, iha população 700 000 mate tamba Forças Armadas Indonésia nia ação. Entre tinan 1980-1984, ema 100 000 confirmado mate tamba hamlaha no moras. Mas que Indonésia afirma katak ema 30 000 mak mate. Maibé viragem loloos foin hatudu iha 12 de novembro de 1991, massacre santa cruz iha nebé Forças Indonésias tiru mate manifestante barak iha manifestação ne’e. Mas que Indonésia hateten katak ema 50 mak mate de’it. Enquanto fontes seluk hatudu katak ema 400 mak mate iha massacre ne’e[9].
Iha tinan 1996, Timoroan na’in rua hanesan: Bispo D. Carlos Filipe Ximenes Belo, SDB no Dr. José Ramos Horta simu prémio nobel da paz nu’udar figura principal da resitência timorense liliu reconhece sira nia serviço em prol ba solução justa no pacífica iha conflito Timor nian. No Prémio ida ne’e iha impacto boot teb-tebes ba opinião pública internacional no governo no organização não governamental sira atu iha a favor ba Timor nia autodeterminação.
Iha maio de 1998, presidente Soeharto abandona nia cargo, depois de 32 anos. Substitui fali hosi presidente B.J. Habibie, nebé iha interesse uitoan ho política Timor nian. Nune’e iha junho 1998, Indonésia informa ba secretário geral ONU no Portugal katak sira preparado atu fo autonomia alargada ba Timor. Ba Indonésia forma ida ne’e nu’udar solução ka fim ba problema maibé ba Portugal considera autonomia nu’udar solução transitória, nebé depende ba exercício de direito ba autoderminação povo Timor nian. No resistência timorense nebé lidera hosi Sr. José Alexandre “Xanana Gusmão” mos aceita ho conceito autonomia transitória hodi hakat ba referendum.
Iha 27 de janeiro de 1999, presidente Habibie anuncia inesperadamente, katak se Timor oan sira la concorda ho integração, ho base iha plano autonomia nian, território ne’e bele separa hosi Indonésia. Ao mesmo tempo, secretário geral ONU, descreve, declaração presidente Habibie nu’udar acto de um estadista envergadura. No declaração ida ne’e iha impacto no decisivo tebes iha processo negociação no bem acolhida hosi Portugal. Maibé kona-ba questão independência Indonésia tau nu’udar segunda opção[10].
Iha dia 5 de maio de 1999, hamosu acordo ida entre República Indonésia no República Portuguesa, hodi hamosu acordo tolu mak hanesan:
- Acordo entre a República da Indonésia e a República Portuguesa quanto à questão de Timor-leste
- Acordo relativa às modalidades da consulta popular ao povo Timor-leste através de uma votação direta; e
- Consulta popular em Timor -Leste: acordo sobre segurança.
Hosi Portugal nia representa hosi Sr. Jaime Gama (Ministro dos negócios estrangeiros de Portugal) no Indonésia representa hosi Ali Alatas (Ministro dos negóçios estrangeiros Indonésia nian), iha tempo Kofi Anan nu’udar secretário geral (ONU). Governo rua ne’e confia iha secretário geral ONU kona-ba organização no condução consulta popular iha nebé bele facilita timor oan sira: aceita ou receita autonomia especial ba República Indonésia. Iha 22 de maio de 1999, Kofi Anan propõe cria missão das nações unidas iha Timor, United Nations Assistance Mission in East Timor (UNAMET), atu organiza no realiza consulta popular. Tuir dados hatudu katak missão ne’e composta hosi 24 membros staf internacional, 420 voluntários das nações unidas (funcionários eleitorais), 280 policias civis, 50 oficiais de ligação militar no cerca de 400 funcionários timorenses contratados localmente[11].
Iha dia 1 de julho de 1999, Sr. Ian Martin to’o iha Dili nu’udar representante especial Secretário Geral (SRSG) Nações Unidas ba Timor. Iha dia 3 de julho 1999, Nia hahú halo operação serviço iha Timor. Sira halo buat barak tebes iha Timor liliu liga ho preparação ba referendum. No iha dia 6 de Agosto de 1999, termina registo eleitorais. Nune’e iha Timor ema hamutuk 433 576 no iha centros estrangeiros hamutuk 13 090 pessoas. No centro votação hamutuk 200 tanto rai laran no rai liur. Iha 29 de Agosto de 1999, nu’udar véspera consulta popular, secretário ONU husu ba timoroan hotu katak: “Vivam de acordo com as suas responsabilidades perante a história”. No iha loron 30 de Agosto de 1999, ho aten barani no responsabilidade tomak timoroan sira nebé registrado hakat ona ba centro votação hodi exerce sira nia direito no concretiza sira nia mehi ba liberdade ne’e rasik. Iha dia 4 de setembro de 1999, anuncia resultado iha Dili: hatudu katak 94.388 (21,2%) vota ba otonomia e 344.580 (78.5%) vota ba autoderminação. Nune’e votante hamutuk 446.953 mak vota iha consulta popular ne’e[12].
Hosi cronologia badak ne’e no ho resultado consulta popular nian ne’e confirma duni katak desejo ba liberdade ne’e metin iha timoroan sira nia fuan, nune’e fo aten barani atu mate ka moris ukun rasik-an.
- Oinsá geração foun banati hodi continua luta ba desenvolvimento rai Timor nian
Hosi ponto rua nebé ha’u descreve, nu’udar geração foun ou continuador ba luta ida ne’e: Saida mak sai bukae ba iha ita nia processo luta? Baseia ba ha’u nia reflexão, ita precisa comunga espírito patriotismo no nacionalismo hodi tane aas interrese nação nian ka bem comum do que interesse privado. Sentimento ida ne’e metin iha povo maubere nia neon no hatudu ba ação concreta ida mak fo sira nia vida no capacidade tomak ba libertação da pátria. Jovem ohin loron precisa hamriik iha referência hirak ne’e, atu keta nakdoko no keta sidi lerek iha rai tetuk sira. Iha espírito patriotismo no nacionalismo aas mak impulsa no fo coragem atu ita manifesta ita ninia criatividade hotu nebé haksumik hela iha ita ida-idak. No sai cidadão Timor ida nebé sólido, sério, honesto, matenek, fraterno no solidário. Nune’e ita iha esperança ba timor ida nebé inclusivo no sem discriminação.
Dedicação no prontidão mak exige ema nebé iha fuan (sentido compaixão), ba ninia belun, família, nação nsst. Dedica-an ida ne’e primordialmente, pessoa ida maibé nia efeito ba ema hotu. Jovem sira uluk hatene contribui ba buat nebé comum la’os buat nebé pessoal ka grupal. Fo tomak ba nação se nação precisa. Prontidão significa la iha razão atu labele terus no mate ba rai ida ne’e. Pronto fo vida la hanoin ba futuro sira nian rasik la hanoin mos atu goza sira nia moris. Sempre iha ka sempre pronto wainhira nação preçisa. Valente/ aten barani mak sai aimoruk hodi hasoru moras oi-oin. Hanesan saudoso Nicolau Lobato hateten “A libertação não é uma dádiva; é uma conquista; todos os povos lutaram para conquistar. É uma constante histórica. Para libertar é preçiso lutar. Porque habemos nós é fazer exepção”[13]. Nune’e exigência ne’e mak aten barani povo maubere nian. Nune’e mak Paulo Coelho afirma “Kebranian adalah kunci untuk kemenangan”. Aten barani ida ne’e mak hatudu liu hosi sira nia abnegação no dedicação total ou absoluta ba país no povo ida ne’e nia di’ak no liberdade. Sai duni patriota nebé la hakiduk ka valente iha luta contra inimigo. Basa ba herói no heroina sira espírito valente sai nu’udar base fundamental atu atinge meta ida.
Hanesan geração foun no continuador ba rai doben ida ne’e, hateke ba história hatudu ona katak jovem uluk nia meta atinge ona mak independência. Ba ita, jovem sira ohin loron nian, iha ka la’e missão nebé sira tula mai ita nia kaba’as atu continua: saida mak ita sei halo ba nação ida ne’e nu’udar ita nia responsabilidade? De facto, liberdade sim, mas desenvolvimento ainda não, ainda está na nossa mão. Povo moris livre ona maibe seidauk moris di’ak. Responsabilidade ita jovem nian la’os atu fo han sira maibé oinsá prepara-an didi’ak moralmente no intelectualmente hodi ukun rai ida ne’e, contribui ba bem-estar povo nian.
Ita precisa hatene ita nia história rasik atu nune’e bele iha espiríto foun. Basá memória passada sai motivação boot ba ita nia moris nu’udar estudante. Basá se ita hakarak atu hateke dook ita precisa sa’e iha ita aman sira nia kaba’as. Nu’udar comandante região IV Sr. Hernesto Fernandes “Dudu” hateten: “Uluk ami kaer kilat ba funu hasoru inimigo no ami selu ho ruin no ran. Agora imi tenki kaer lapiseira hodi preenche ukun rasik-an”[14].
Ikus liu atu termina ha’u nia hakerek ida ne’e, ha’u iha coragem atu repete saudoso eis presidente RDTL, Sr. Francisco Xavier do Amaral nebé hateten “Ita independência ona maibé povo seidauk moris di’ak, to’o ona tempo atu ita hamaran povo nia matan-ben. Futuro di’ak, naroman, hakmatek no moris di’ak sai hanesan mehi ida tamba povo hamrook hela ba moris di’ak. To’o ona tempo ita tane aas domin, paz no hakmatek no moris di’ak”.
Iha estrofes declamação jovem Timoroan ida nian hakerek nune’e:
Jovem nia serviço mak estuda la’os tuda
Jovem tenki hamriik iha oin maibé labele buka oin
Jovem tenki creativo no ativo la’os bandido no badio
Jovem tenki hanoin constrói la’os destroi
Viva Timor… viva consulta Popular… viva Heróis da Pátria…
BIBLIOGRAFIA
ANTUNES, Alberto; ESTANQUEIRO, Antonio; VIDIGAL, Mário, Dicionário breve da filosofia, 5a edição, lisboa, 2015, APUD, MAIA, José, Apostilha da materia conceito básico da filosofia I ano ISFIT, Fatumeta, Dili, 2022.
Departamento de Informação das Nações Unidas, As Nações Unidas e Timor Leste a autodeterminação através de consulta popular, Nova Iorque, 2000.
Presidência de Conselho de Ministros, Cronologia consulta popular, os últimos passos da libertação nacional, 2a edição, 2019.
GUSMÃO, Martinho Germano da Silva, Sabemos, e podemos, e devemos vencer, autobiografia intellectual de Niccolao dos Reis Lobato, 1a edição, Centro Nacional Chega Balide, Dili, 2018.
SOARES, Natalino da Costa e BORROMEU, Martinho, Hernesto Fernandes DUDU: Visão, missão no ação, gráfica UNTL, Dili, 2021.
SOUSA, Domingos Francisco de Jesus, A ocupação Indonesia e a Resistência Timorense (1975-2002), tese de doutoramento, Instituto Universitário de Lisboa, 2018.
TJAHJADI, Petrus, Simon L, Petualangan Intelektual, Kansius, Yogyakarta, 2004.
SOARES, Natalino da Costa e BORROMEU, Martinho, Hernesto fernandes DUDU: Visão, missão no ação, gráfica UNTL, Dili, 2021, p. 30.
SOUSA, Domingos Francisco de Jesus, A ocupação Indonésia e a resistência timorense ( 1975-2002 ), tese de doutoramento, Instituto Universitário de Lisboa, 2018, p. 1.
GUSMÃO, Martinho Germanoda silva, Sabemos, e podemos, e devemos vencer, autobiografia intellectual de Niccolao dos reis lobato, 1a edição, centro nacional chega Balide Dili, 2018, p.80.
Ibid., p.43.
Cf: SOARES, Natalino da Costa e BORROMEU, Martinho, Op. cit., p. 3.
ANTUNES, Alberto; ESTANQUEIRO, Antonio, VIDIGAL, Mário, Dicionário breve da filosofia, 5a edição, Lisboa, 2015, p. 11, APUD; MAIA, José, Apostilha da materia conceito básico da filosofia I ano ISFIT, Fatumeta, Dili, 2022, p, 20.
TJAHJADI, Petrus, Simon L., Petualangan intellectual, Editor Kansius, Yogyakarta, 2004, p.71
Departamento de Informação das Nações Unidas , As Nações Unidas e Timor Leste A autodeterminação através de consulta popular, Publicação do Departamento de Informação das Nações Unidas, Nova Iorque, 2000, p. 3
Ibid., p. 3-11.
Ibid., p. 6.
Presidência de Conselho de Ministros Cronologia consulta popular, os últimos passos da libertação nacional, 2a edição, 2019, p. 8-24.
Departamento de Informação das Nações Unidas, Op, Cit., p. 8-24.
GUSMÃO, Martinho Germano da silva, Op. cit. p.80.
SOARES, Natalino da Costa e BORROMEU, Martinho, Op. cit. p.34.