REITOR ISFIT PARTICIPA IHA CERIMÓNIA LANÇAMENTO LIVRO MANUAL DO ALUNO

Dili – Reitor ISFIT, Pe. Justino Tanec participa iha cerimónia lançamento livro manual do aluno nebé organiza hosi Comissão Nacional da Educação Católica de Timor-Leste (CONECTIL). Cerimónia ne’e realiza iha loron 29 fulan agosto tinan 2024 iha salão ISFIT.

Livro manual do aluno nebé CONECTIL lança kona-ba Educação Moral e Religião Católica Ensino Básico 3⁰ Ciclo 7⁰ Ano de Escolaridade. No ida nebé sai orador principal hodi fo oratio sapientiae iha cerimónia histórica ida ne’e mak Pe. Mateus Afonso, nebé mak hanesan mós presidente CONECTIL sessante.

Presidente CONECTIL atual, Pe. António Quenser do Balino do Carmo hato’o bemvindos ba participante sira hotu nebé participa iha cerimónia ida ne’e. Presidente ne’e mós hato’o ninia profundo gratidão ba hot-hotu ninia presença no apoio. Tuir Pe. Quenser “Ita boot sira nia presença hanesan força ida ba educação católica iha Timor-Leste”.

“Educação moral no religião desempenha papel fundamental iha formação caracter no construção valores iha individuo no sociedade Timorense. Educação moral refere ba processo aprendizagem nebé mak orienta individuo kona-ba buat nebé los no sala, promove ética, empatia no respeito ema seluk. Iha sikun seluk religião oferece base espiritual no comunitária nebé bele reforça ensinamento moral sira”, haktuir Pe. Quenser iha ninia discurso.

“Atu responde ba necessidade fundamental ba eduacação moral, caracter no religiosa nian, igreja hola papel importante liu hosi CONECTIL estabelece currículo formal ida hodi hanorin no forma Timoroan sira. Tanba ne’e, ohin momento osan mean ita hasoru malu hodi afirma Uma Kreda nia papel nudár contribuição ba estado Timorense”, hatutan Pe. Quenser molok remata ninia discurso.

Iha momento hanesan, Presidente CET, D. Norberto do Amaral, Bispo da Diocese de Maliana haktuir iha nia discurso katak “Ami husu ba Ministério da Educação atu tau iha consideração ba buat di’ak nebé hosi CONECTIL hasai ona no bele lori ita nia oan sira ba di’ak tuir educação nebé ita hotu hakarak atu too ba”.

Lançamento livro manual do aluno ida ne’e assina hosi Presidente CET, D. Norberto do Amaral, Bispo da Diocese de Maliana hamutuk ho representante Ministra da Educação, Dra. Cecilia E. Monteiro, chefe departamento do currículo da educação. No hirak nebé sai hanesan testemunha ba lançamento ne’e mak hanesan D. Leandro Maria Alves, Bispo da Diocese de Baucau e Secretário Geral da CET. Mgr. Marco Sprizzi, representante Santa Sé em Timor-Leste.

Depois de cerimónia lançamento ida ne’e, Bispo nain rua hamutuk ho Mgr. Marco Sprizzi ho representante Ministra Educação simbólicamente kuda mós ai oan iha jardim exterior ISFIT nian nebé mak oras ne’e daudaun iha hela processo construção nia laran.