(Pe. Joaquim Sarmento, S.J.)
Hakbesik-án atu simu Sua Santidade Papa Francisco nia visita mai ita nia rain no ita nia Kreda, di’ak los ba ita ida-idak nudár sarani no Timor oan atu contribui ba reflexão sira, prepara ita nia án atu sai rai metan di’ak ba fini nebé Amu Papa sei kari. Seja bemvindo contribuição di’ak ho forma sa de’it, atu halo ita bele compreende: hanesan visita Santo Papa João Paulo II nian importante lós tiha ona ba Timor iha tempo ocupação estrangeira nian laran, saida mak importánsia visita Papa Francisco nian ba Timor independente ohin loron? Se JP II mai hetan Timor iha dadur laran, Papa Francisco sei mai hetan Timor ida oinsá? Tamba saida Amu Bispo sira desidi atu hili liafuan exortação “Que a vossa fé seja a vossa cultura” atu sai lema hodi anima no dirige ita nia fuan iha visita Papa Francisco nian? Por alguma razão.
Lema nebé Igreja Timor hili ona, “Que a vossa fé seja a vossa cultura” ne’e tema ida nebé importante tebes iha ita nia tempo ohin loron Timor nian. Liu tiha tinan 500 presença cristandade nian iha Rai Timor, fiar sarani goza tempo ida buras em termos de número. Maibé fiar sarani (fé cristã) nudár cultura moris nian, no sentido katak valores sira dotrina sarani nian sai duni princípio s nebé anima Timor oan sira nia moris, katak ita moris tuir duni iha moris lor-loron, ne’e buat ida foun ka nurak hela. Ema matenek sira fo hanoin ita katak iha 1930 ema católico iha população Timor ne’e 4% de’it. Besik ba invasão Indonésia, percentagem ne’e sa’e ba to’o besik 30%. Tinan sanulu liu tiha invasão militar Indonésia nian, número sa’e to’o 85%. Ne’e katak, iha prazo tinan sanulu de’it, número população católica iha Timor sa’e 55%. Motivo sira hanesan segurança , cultura, humanitaria, no lei Indonésia nian sai razão nebé bele explica crescimento ida lalais tebes ne’e.
Aumento iha número ne’e la nesesariamente lori-ho qualidade moris sarani nian ida nebé auténtica. Ema barak simu batismo la ho preparação adequada iha tempo emergência funu nian, tempo violênsia nebé halo vida la regular. Nune’e nakloke luan odamatan ba sinkretisme, superfisialidade, ritualisme, relativisme moral, nebé sei iha presença forte iha Timor. Ha’u observa kleur ona katak iha Timor, iha ‘atividade religiosa’ barak los, maibé ‘experiência espiritual’ sei oituan hela, exatamente tamba iha drama separação entre fé no cultura, entre ambiente espiritual iha liturgia nia laran (sacramento rito) no prática moris lor-loron nian (sacramento vida). Halo ita hanoin fali Jesus bolu atenção ba ita iha Evangelho S. Mateus iha loron Domingo XXII: Povo ida ne’e adora Ha’u ho ibun tutun de’it, maibé nia fuan dook hosi Ha’u. Tamba ne’e Igreja nia missão iha Timor ohin loron ‘não é baptizar os gentios más evangelizar os baptizados’. Ita hotu sei precisa haka’as-an atu moris tuir valores Evangelho nian nudár prinsipios de guia iha ita nia moris no estrutura sira.
Se iha tempo Indonésia, ema halo distinção claro entre ‘kebudayaan’ (cultura) no ‘kesenian’(arte), ita ohin loron ladun halo claro ida ne’e. Ema usa tais ita dehan ‘hatais cultura’, ema dahur ka tebe, ita dehan ‘dança cultura’. Hatais ka dahur ne’e, la’os exactamente cultura, maibé forma ka expressão de’it hosi cultura, arte ida de’it atu hatudu valores nebé kle’an liu. Cultura uluk liu hotu significa conjunto de valores ka prinsipios fundamentais nebé anima, orienta, ka caracteriza sociedade ka grupo sosial ida. Depois mak sei refere ba aspeto sel-seluk hanesan normas, tradição, lingua, costumes, crenças , tecnologia, etc. Dalaruma ita lori ida ne’e ba to’o iha aspeto fiar nian. Ema tara cruz iha kakorok ka iha tilun la halo nia sai católico, ne’e arte de’it. Ema moris tuir prinsipio sira iha dotrina Jesus nian, se valores Reino nian (paz, justisça, verdade, amor, compaixão, perdão, nst) mak anima no dirige nia vida tomak (atitude, pensamento, liafuan, hahalok, decisões ), ne’e mak dehan ema ne’e nia fé cristã sai duni nia cultura.
Exemplo ki’ik ida. Iha ita nia rain ohin loron, se ita rona ema dehan ‘se ó perdua nia ne’e ó la mane, o tauk-ten, o mau-fetok’. Ita rona liafuan ne’e, se ita honesto ho ita nia aan, iha kle’an ita nia estrutura mental nian, ita concorda hela ho liafuan ka atitude ida ne’e. Enquanto, valor Evangelho nian tane ás perdão nudár expressão ás liu hosi domin (perdua katak hadomi ema nebé la merese simu ita nia domin).
Tema visita papal “Que a vossa fé seja a vossa cultura” ne’e sujeitu ba hanoin oioin. Buat saida mak di’ak iha cultura Timor nian nebé halo Evangelho bele encaixa di’ak? Iha buat di’ak barak los. Valores sira hanesan religiosidade (relação ho ‘mundu seluk’), fraternidade (lasu familiar no piedade filial), resistênçia no martirio (sacrifisio), respeitu ba tradição, responsabilidade coletiva no resiprosidade, pobreza no simplisidade, nts. Independênsia Timor nian oferese mos espaço atu ‘redescobre’ identidade povo nian (harí uma lisan no seluk tan) no conhede ita nia identidade rasik di’ak liu tan. Iha conferência ida iha Paroquia Becora iha 2002, jovem ida husu ba ha’u saida mak unifica Timor? Hau hatan buat tolu: nia história, nia fé católica, no lian Tetum. Maibé bele iha ema nebé haré cristianismo nudár cultura estrangeira ida, ocidental, no haré história nudár processo superação ba cultura local (halakon tiha cultura local). Em vez de desenvolve ‘teologia da história’ Timor nian ida atu sai estrutura interpretativa ida hodi compreende ita nia história nudár manifestação Na’i Maromak nia plano providensial ba ita nia rain Timor. Karik bele to’o ba descreve ‘o Rosto Timorense de Cristo’.
Diálogo entre cultura Evangelho nian ho cultura local (lulik) sei sai hela ponto ida nebé seidauk claro, seidauk distingue didi’ak entre ‘adora lulik’ (Enquanto lulik ne’e troca tiha Maromak nia fatin) no ‘venera beiala sira nia tradição ’ (nebé la nesesariamente contradiz valores ka prinsipio Evangelho nian). Liu-liu se ita hanoin fali ‘lulik’ foun sira nebé ema adora mate ohin loron hanesan osan, poder, án-rasik, telemovel, ka culto ba individu ruma iha organização popular sira. Seidauk sura cultura iha ita nia tempo ohin loron, cultura digital no informática, ciençia no tecnologia, comersio, nebé sadik Igreja, liu-liu iha ita nia contexto ka cultura de aparências nebé encaixa di’ak los ho superficialidade iha ema sarani barak nia moris. Sei iha aspeto ka dimensão barak iha ita nia moris lor-loron nebé precisa tebes evangelização , katak princípio ka valores ka virtudes sarani mak prevale no ukun efetivamente. Hosi kedas buat nebé prático no individual ba to’o aspeto boot sira hanesan hala’o política ho moral, hala’o bisnis ho étika cristã. Ita lebele satisfeito ho número boot iha percentagem população católica, bele acontece katak iha maioria hanesan ne’e bele aplica lei comércio nian: ‘penawaran tinggi, harga turun’. Buat sira ne’e hatudu daudaun ona processo secularização ida, ema hamenus ona halo referênsia ba valores sira Evangelho nian no autoridade insitucional Igreja nian.
Ha’u hanoin katak ba Igreja, independênsia ne’e la completo se povo continua sai atan ba inimigo klamar nian, ba poder boot sira, ka ba grupo ki’ik vicioso no aproveitantes balu nebé lori povo nia naran hodi buka di’ak ba án rasik. Sei iha opressão ho formas oioin (sosial, política, cultural, religiosa), nebé Timor oan la consegue liberta án. Ita seidauk to’o ba liberdade auténtica, verdadeira, duradoira. Luxúria barata, vício oi-oin sei continua hela dadur ita Timor oan barak. Husik ita nia án atu colonializa malu, ka inimigos do Evangelho colonializa ita. Jesus Cristo, ita nia ‘Dalan, Lialos no Moris’ nia ukun ka nia ‘cultura’ seidauk efetivo didi’ak iha ita nia fuan no ita nia rain, ita nia escolha no procedimento sira, ita nia sistema no estrutura sira. Cultura da morte mak sei domina hela: oho, sobu, hafahe ema, tesi, sunu, estraga ema nia futuro, halakon ema nia oportunidade, no formas violênsia barak seluk (lia mate sira baibain halibur ema barak liu, ema fo osan no tempo barak liu, nst). Hasés tiha Arte Moris, haburas fali artes marsiais. Ha’u observa hela hosi tempo luta mai ohin loron, ‘mate ba Cristo’ pronto, maibé ‘moris ba Cristo’ lae.
Igreja nia missão inclui promove ‘cultura de vida’, valoriza no protege dignidade ema nian iha nia fase sa de’it. Hanesan halo campanha atu educa atu fo folin boot ba vida, no desenvolve política atu protege vida no inan rai, tau matan ba sira nebé vulneravel. Ne’e foin rohan de’it hosi trabalho de casa boot ida.
Ita contempla Timor ida nebé desde 2008 ha’u descreve nudár “um Timor ‘surpreendido pelo dinheiro e pela liberdade”. Iha confusão de valores barak tamba experiénsia violênsia naruk no kle’an, iha choques de culturas oioin, iha necessidade ba sobrevivência nebé obriga. Iha confusão laran, ita nia consciência moral la kro’at ona atu distingue di’ak no át, valores Evangelho nian seidauk nakfilak sai ita nia critério ba escolha sira. Se oho ne’e bele hetan osan, beik mós bele kaer ukun no manan osan povo nian, ka lelang ema nia sasán ita considera abilidade ida (hatene moris), então ita iha problema cultura Evangelho nian. Ema matenek uluk nian ida iha visão ida katak iha tempo ema bulak nian, ema ida la bulak ne’e ‘justru’ nia mak bulak fali. Ohin loron iha Timor, iha serviço fatin, se ema hot-hotu halo corrupção (osan, tempo, autoridade, espaço, nst), então ida la corrupto ne’e nia mak estranho fali, nia mak beik fali, nia mak ema considera ‘miring’ fali. Amu Papa Francisco hanorin barak kona-ba discernimento inaciano, exactamente tamba situação confusão de valores hanesan ne’e.
Ita husu ba ita nia aan, se violência oioin (física, verbal, institucional, nst) acontece iha ita nia rain católico ne’e, ne’e maioria hahalok ema católico nian tamba ita maioria duni iha número, ita nia pergunta mak ne’e: to’o iha nebé Evangelho sai duni ‘roman no masin’ nebé leno no fo sabor ba ita nia moris hamutuk? Sai duni ita nia cultura? Oinsá ita nia moris espiritual pessoal bele contribui ba sociedade ida nebé melhor? Oinsá ita bele habadak distánsia entre: moris santo iha misa laran no moris han malu ‘fahe malu namkari’ liu tiha misa remata? Oinsá anúnsio ba Evangelho ne’e lori duni conversão iha fuan no liberta duni ita hosi formas de opressão oioin nebé sei continua hela ohin loron?
Ha’u pessoalmente haré visita Sua Santidade Papa Francisco nian, ho lema “Que a vossa fé seja a vossa cultura” ne’e visita ida nebé Timor precisa tebes. Karik ita bele classifica visita ne’e nudár ‘urjente’. Se Santo Papa João Paulo II mai visita Timor wainhira Timor iha hela dadur laran, buka hela liberdade. Visita ida ohin loron la menus importante, la menus urjente, la menus exigente. Timor iha hela dadur laran, hamrok ba liberdade ida lolós nebé so Na’i Maromak de’it mak bele fo, no Na’i Maromak fo tiha ona liu hosi Jesus Cristo. La to’o ba Timor atu reconhece de’it Igreja nia papel iha luta, assina concordata, ka hasuli fundos hosi rikusoin Timor nian ba instituição sira Igreja nian. Ita nia nação foun ne’e precisa sai espaço no oportunidade ida atu concretiza, atu haburas buat nebé ita hanaran “O Reino de Deus”. Ita nia nação foun ne’e precisa redescobre fila-fali no hatur nia uma kain bot iha airin-mean ida nebé lolós, nebé anin boot no laloran boot sei la sobu. No ida ne’e ita hatene: Cristo nudár ita nia fatuk inan.
Wainhira foin aprende lé, ha’u contente bele hatene lé liafuan “Adveniat Regnum Tuum” (halo Ita nia Reino to’o mai ami) nebé imprimi boboot iha arco principal Igreja Soibada nian (tinan ne’e selebra 120 anos). Ema boot sira iha Timor nia história recente, sira nebé moris iha Soibada, ka estuda ou hanorin iha neba, sira nebé ikus mai harí partidos políticos, ka involve-án iha luta Timor nian, sei hanoin hetan liafuan sira ne’e. Ohin loron ha’u lé fali liafuan sira ne’e nudár visão no missão ida nebé ami nia missionário Jesuita sira uluk marca hela ba ita nia Rain Timor. Ita labele haluha katak Na’i Jesus nia mensagen central la’os Igreja, maibé “Maromak nia Reino”, no Igreja existe atu serbí ba Reino ne’e. Reino nebé ita hanesan ita hananu iha missa: Reino de amor, de justiça, de paz, de perdão, de verdade, de compaixão, de liberdade. Ita nia estado de direito nebé beiala no asswa’in sira mehi sei dirige án ba direção Maromak nia Reino ne’e, nia emar sira moris iha cultura Evangelho nian.
Amu Papa Francisco nia visita sei husik hela compromisso boot ida ba Timor-Leste Independente: ba ita nia ukun na’in civil, eclessial, tradicional, no militar, ba ita hotu povo sarani tomak. Ita harohan no haka’as án atu ita hotu bele aproveita di’ak ‘momentum’ graça ida ne’e, atu visita ne’e iha duni impacto ida ba ita. Saida mak ita ida-idak precisa halo? Visita ne’e la’os buat mágico ida nebé halo ita sai santo/a matak derepenti tiha de’it. Ita harohan atu força moral no mensagem hosi visita ne’e bele inspira no hakbiit duni no sai ponto de partida foun ida ba ita nia povo sarani iha Timor. Ita sei precisa hadia ita ida-idak nia án (valores Evangelho nian sai duni ita nia ‘roman no masin’), ita precisa hadiak ita nia instituição sira, ita nia lei, ita nia preferência sira, ita nia catequese (liu-liu catequese ba adultos nebé necessário maibé menus lós), no aspeto barak seluk. Mai ita hakaas-án sai rai metan di’ak, husik Amu Papa Francisco nia visita hafoun ita. Seidauk tarde demais atu Timor re-examina nia identidade, nia razão de ser, nia airín mean sira, nia hun no rohan, no ita hotu serviço hamutuk hatuur sasan halo loloos fali. Bem vindo, Sua Santidade Papa Francisco. Adveniat Regnum Tuum.