Introdução
Hanesan ita hotu hatene katak, oras ne’e ita iha hela fase preparação ba eleição presidencial, no momento de escolha ka hili hanesan tempo di’ak ida mai ita atu kadi ita nia kakutak atu hateke ba dook konaba ita nia futuro. Hanesan ema dehan “ha’u nia voto ida determina ha’u nia moris tinan lima nian”. Ho momento ida ne’e ita bele husu: Tanba sa mak ha’u tenke tetu no hili? balun mos bele husu tanba sa mak tenke hili líder nebé di’ak? pergunta hirak ne’e sadik no book nafatin ita atu hanoin didi’ak molok tama ba eleição.
Ohin loron ita hahú haré no rona ona iha média no balun assisti direita, oinsa ita nia candidatura sira ko’alia ka aprensenta mai ita, sira nia visão no programa sira nebé sira iha no sei hala’o karik sira eleito nu’udar Presidente da República. Haré ba ita nia realidade nebé ohin loron ita hasoru, ita iha candidatura hamutuk salunu resin neen (16) no sira ida-idak mai ho visão política no programa nebé la hanesan. Sira ida-idak mos iha capacidade nebé la hanesan, maibé sira mesak Timor nia ema no ran Timor nian. Tanba ne’e,
Iha âmbito da festa democracia nebé ita sei hasoru, exige maka’as ita nia dever sira nu’udar cidadão, liu-liu mak husu ita atu exerce ita nia direito liu husi eleição ou votação tanba husi nebá mak ita sei determina ou hili ita nia lídereança nebé sei ukun no tau matan ba ita iha rai doben ida ne’e. Dalabarak ita hili tiha, maibé ikus mai ita sente arependido ho ita nia escolha, ita sente hanesan la’o sala dalan ou tama sala jalur, loloos ita hakarak atu ba taibessi, maibé como ita sa’e sala microlete, então, ita ba mosu fali iha tasi-tolu. Tanba ne’e, atu anticipa buat hirak ne’e la bele acontece, iha momento kmanek ida ne’e, ha’u hakarak convida ita hotu atu hanoin hamutuk ita nia líder sira ne’e, ida nebé mak merese sai hanesan ulun atu ukun, ou sai hanesan aman atu tau matan ba nia povo.
Presidente husi Povo no Presidente ba Povo
Ita assisti beibeik iha média sira nebé fo sai konaba discurso político husi ita nia político na’in sira. Iha discurso político hotu-hotu, sempre ko’alia konaba povo. Tuir princípio da democracia nebé ita adopta ne’e, buat hotu tenke fundamenta iha base do estado, nebé trata kedas iha identidade do estado nebé hatur iha vontade popular, no respeita pela dignidade humana, tanba ne’e mak iha ita nia C-RDTL artigo (1o) mosu kedas ho liafuan ida ne’e “A República Democrática de Timor-Leste é um Estado de direito democrático, soberano, independente e unitário, baseado na vontade popular e no respeito pela dignidade da pessoa humana.” Presidente nebé atu ukun ne’e, tenke representa duni povo, se nia representa ona povo significa nia ho povo. Liderança nebé di’ak ita bele sukat husi nia espírito no vontade atu servi. Hanesan matenek nain sira dehan, sai líder nebé di’ak tenke iha vontade, labele mosu de’it ho linguagem persuasiva hodi tane liman ba povo nia confiança, ikus mai haluha povo wainhira nia ka’er ukun; nune’e, precisa líder nebé hatu’ur coerência iha liafuan no hahalok.
Perguntas ida nebé ita precisa husu mak, presidente ideial nebé povo hein ne’e oinsa los no sei sai oinsa los banhira nia eleito? Max Weber apresenta princípio política ho frase simples “Equação entre meios e fins”(WEBER, 2003: 10). Nia considera fins hotu nebé ema atu to’o ne’e tenke liu husi meios nebé di’ak, la’os aproveita meios hodi enche ho buat aat atu hetan nia fins nebé di’ak. Iha ne’e contrário ho filósofo maquiavel dehan: “o fim justifica os meios” (HESSE, 2012: 61), katak buat hotu nebé ita usa nu’udar meios ne’e la importa nia atu aat ka di’ak importante mak nia fins ne’e di’ak. De facto, ita nia político sira balun moris tuir hela doutrina política weber nian no balun mos koko prática princípio política Maquiavel nian hodi la importa ho meios, importante mak sira kaer ukun atu halo corrupcão ka lae ne depois mak haré, importante oras ne’e, ha’u precisa o atu atinji ha’u nia meta final atu bele kaer ukun. Nune’e, político na’in ou liderança nebé di’ak tenke hatudu husi nia fuan atu protege no hadomi nia povo, la’os de’it ho liafuan. Maibé sorin seluk Weber dehan “O homem político constrói a sua vida a partir do sentido interior” (WEBER, 2003: 72). Husi comparação hirak ne’e ita bele ona responde pergunta iha leten katak, líder nebé di’ak no ideal be povo hein maka tenke ukun ho fuan no hanoin liu husi pensamento ida di’ak no mos labele ukun ho liafuan, rahun iha sentimento hodi manobra pensamento, atu nune’e wainhira eleito ona bele kaer princípio lori povo ba moris di’ak no matenek.
Ita hotu hatene katak presidente da república nu’udar mahein povo no nação nian nebé representa povo tomak. Oras ne’e, ema hotu halo campanha atu promove ida-idak ninia candidatura. Entre hirak ne’e, ida mak sei sai hanesan ita nia Presidente da Rebública. Knaar servi ne’e dom ida, maibé precisa mos sacrifício tanba sai tiha boot mak tun fali mai servi ne’e dalaruma susar tebes, tanba conceito ema boot ne’e tenke dignifica no tau nia iha fatin nebé digno. Ukun na’in nebé di’ak laos mai ho promessa mamuk hodi kalsu sira nia poder político, la’os mos ida nebé mai ho lianguagem fantasia sira, katak ha’u pronto hikis kosar ba povo nia moris di’ak, nebé ikus mai husik povo kosar metan suli no sira tur iha AC laran kosar la sai. Ukun nain di’ak tenke sai responsável ba nia profissão katak hetene servi ho domin no dedicação. Presidente di’ak tenke cria união no amizade ho nia povo hanesan Hannah Arendt iha nia teoria política dehan: “O homem não é autárquico, porém depende de outras em sua existência” (ARENDT, 2018:17). Husi união no amizade ne’e mak bele cria bem estar ba povo no nação. Presidente ba ema hotu ne’e significa interesse comum mak tenke tau ba assunto prioridade, presidente ida nebé tenke metin ho nia princípio, la’os mai kuda promesa falso atu hetan buat nebé nia hakarak.
Haré ba ita nia história hahú husi ita hetan ita nia independência to’o mai ohin loron, ita hasoru crise oi-oin ho forma nebé la hanesan, até mosu crise instituicional hodi halo povo mak sofre ba diferença ideologia nebé influencia tebes ita nia ukun na’in sira halo implementação política, soke malu no halo ita nia orietanção política marca passo hela de’it iha retórica. Perante crise boot be ita liu ona, buat lubuk ida mak ita apreende husi nebá. Tanba ne’e, tempo di’ak mai ita nu’udar cidadão atu hili ita nia liderança ou presidente da república, atu kore ita husi susar no mukit hirak ne’e. Nune’e, la seluk la leet ita tenke hili husi sira na’in (16) ne’e ida atu ukun. Ita tenke hakro’at ita nia conciência atu tetu di-di’ak líder hirak ne’e, tanba iha balun nebé hein tempo to’o mai hananu knananuk domin be subar ho interesse pessoal iha palku leten, nebé ikus mai haburas de’it mak nepotismo no vingança política… Nu’udar cidadão, ita nia voto ida, vale ba destino nação nian porque ukun nação ne’e significa ukun povo, se ukun povo, tenke moris ho povo. Interesse povo nian mak tenke sai nia prioridade, grupo no organização, la’os tujuan utama atu nia servi, Presidente nebé di’ak mak cresce iha maturidade política, la’os hatudu fali nia infantilidade política, brutalidade, no emocionalidade. Ukun na’in di’ak ida karik labele dehan ha’u hakarak ba Timor ida buras liu maibé na realidade nia luut no kous metin hahalok nepotismo no corrupção, no labele mos dehan fiar aan lao ba oin se povo sei moris hela iha história passada.
Iha provérbio popular ida nebé dehan, falar é prata, silêncio é ouro e pensar é sabedoria. De facto, ita haré no rona ona discurso lubuk ida husi ita nia candidatura sira iha período ida ne’e nian, sira apresenta ona mai ita programa nebé sira sei hala’o karik sira eleito, entre sira ne’e balun iha ona experiência ukun, balun seidauk. Iha palco política, se mak iha masa barak liu nia mak merese kaer ukun, tuir loloos ne’e la’os sai sasukat atu kaer ukun. Mosu partido político bar-barak ne’e la’os tan matenek atu kaer ukun maibé atu hatudu de’it se mak bele mobiliza masa ou grupo barak liu ba nia interesse pessoal, mosu mentalidade atu forma partido oi-oin nebé hetan nia fundamento husi grupo ou arte marsial no arte ritual sira. Iha ne’e, se ita haré didi’ak político na’in sira hahú usa arte marsial no arte ritual sira sai nu’udar apoio eleitoral, la haré ba nia ne’e criminoso ka perigoso, importante mak nia iha kbi’it lori ba manán. Fenómeno foun ne’e mak agora mosu iha ita nia rai, conciente eh lae, maibé ne’e acontece.
Iha âmbito campanha eleitoral nebé ita hala’o daudaun ne’e, candidatura ida-idak mosu iha fatin-fatin atu hato’o sira nia promessa política oi-oin, balun ko’alia liafuan mesak midar, balun mos ko’alia liafuan soke fuan, discurso ka promessa política sira ne’e sempre mosu iha tempo campanha nu’udar meios atu bele lori vitória ba sira. Liafuan furak la fo garantia absoluta katak nia bele halo di’ak no ukun di’ak, tanba ne’e, filósofo Aristóteles hatur conceito “prático” hodi dehan “a prática é o criteria da verdade” conceito ida ne’e iha filosofia hatudu liu ba autor Aristóteles no Karl Marx, liafuan ne’e, nia origem mai husi lian grego (bahasa Yunani) “he práxis” ka “action”. Tuir Aristóteles nia hanorin, práxis ne’e hahalok nebé hatudu ba política no ética, tanba ne’e mak nia hakerek katak “… assegurar o bem de uma nação ou de um estado é uma realização mais nobre e mais divina” (EN,1094b1). Tanba ne’e, práxis hatudu ba hahalok ética política husi ita ida-idak nia comportamento político. Liafuan ne’e mos mak Nicolau Lobato kaer nu’udar filosofia ukun rasik aan nian.
Tanba ne’e, político ida ko’alia barak no ko’alia di’ak ne’e la’os katak nia halo buat foun, maibé político ida la ko’alia barak maibé halo buat barak ne’e mak ita bele dehan halo buat foun. ohin loron mosu promessa oi-oin halo ita bingung ida nebé mak los? falsidade subar aan iha retórica katak ko’alia oin ida halo fali buat seluk, tempo di’ak mak tempo campanha tanba iha campanha, ita iha liberdade total atu expressa buat hotu importante prepara mental ka (public speaking) de’it la interesse ho ema nia comentário ka (feedback), ne’e la sai questão maibé hetok afirma liu tan ho nia incapacidade ho fiar aan katak: Se ha’u la bele karik, ha’u iha assesor atu ajuda, importante mak ha’u manán, lori nação ba oin ka ba kotuk ne’e problema ketak ida, familiarismo iha fatin-fatin ne’e depois mak resolve, corrupção buras los ne’e depois mak haré di-di’ak fali”. Ukun na’in di’ak la’os hatudu nia espírito patriotismo no nacionalismo liu husi juramento hemu ran, ne’e halo esploração humana no cria cadeia da conciência ba povo atu hili, ne’e hatudu katak nia la hadomi povo.
Presidente Ideal nia Knaar
Weber iha nia princípio político, nia hatu’ur meios rua nebé excelente tebes, ne’e mak “viver ‘da’ política” e “viver ‘para’ a política”, iha nia teoria ne’e nia classifica vida política ba parte rua, primeiro nia dehan: “Se vive ‘para’ política” “significa que o político que tenha o interesse para a vontade popular ou seja o bem comum” (WEBER, 2003: 72); porque sai hanesan líder político tenke hatudu nia espírito de possuir ba nia nação no nia povo, tanba nia considerado nu’udar primeira pessoa nebé hatudu dalan ba povo no lori nação ho povo la’o tuir corridor da liberdade, igualdade no justiça nebé sai nu’udar princípio da democracia consagra iha C-RDTL. Iha sorin seluk, nia dehan: “Se viver ‘da’ política” “significa que o homem político procura satisfazer a si mesmo, antes de bem comum. O interesse pessoal e dos partidos políticos é mais alto do que o interesse comum.” (WEBER, 2003: 72). Iha ne’e nia refere ba político na’in sira nebé mosu ho objetivo no interesse pessoal atu hetan sira nia fim, no halibur rikusoin wa’in ba sira nian aan, grupo, família no partido de’it la’os ba povo, nune’e, nia usa política hanesan meios de’it atu hetan nia finalidade. Tendência política ida nebé mak ita precisa opta? Interesse pessoal, familiar no partidário mak dalan di’ak liu atu lori ita sai husi kiak no mukit? Tanba ne’e mak Presidente foun tenke hatudu nia intelectualidade perante situção dolorosa nebé povo hasoru, Presidente labele matenek de’it iha retórica tanba bele mos falha iha prática. Presidente mos labele nonok no kous liman de’it banhira povo monu ba susar, presidente la’os estuda fali banhira haré ema tuda malu tan Presidente nu’udar mahon ba povo, la’os buka mahon ba nia aan no nia partido de’it.
Knaar Presidente nian atu tau matan ba povo, tanba poder nebé nia hetan ne’e mai husi povo no povo rasik mak deposita nia confiança atu sai hanesan aman ba povo, liu husi eleição. Filosófo moderno Francês, Alexis de Tocqueville iha nia teoria da democracia pluralista, nia afirma perigo partidário hodi dehan: “Os partidos têm um grande interesse em determinar a eleição em seu favor, não tanto para fazer triunfar suas doutrinas com ajuda do presidente eleito, quanto para mostrar, por sua eleição que essas doutrinas conquistaram a maioria” (TOCQUEVILLE, 2000: 153). Na verdade, perigo ne’e acontece iha ita nia rain, partido político sira mai ho interesse privado hodi sobu no harahun princípio da democracia, aproveita Presidente eleito sai nu’udar volante atu sira mak dulas, tanba ne’e ita nia rain precisa Presidente nebé matenek no mai ho vontade popular, la’os mai ho osan no posição hodi bosok no explora povo ikus mai, fo terus ba povo no halo povo moris hanesan iha deserto.
Esforço atu liberta povo no liberta pátria ne’e, tenke sai fundamento ba líder ida nia princípio, hanesan liderança máximo tenke responsável ba nia profissão atu kaer ukun. Tuir Nicolau dos Reis Lobato, responsabilidade significa, “mais trabalho, mais esforço, mais vigília, mais, austeridade, mais renúncia ao proveito, mais esquecimento de comodidade pessoal, mais abnegação, mais coragem, mais consciencialização, em resumo ter ideial na vida” (GUSMÃO ‘ed.’, 2018: 90). Tanba ne’e, hili Presidente, la’os hanesan hili líder do suco ou Aldeia, nebé dehan importante nia sa’e ba ukun atu matenek ka beik mos di’ak hela maibé, presidente nia knaar contém assunto tomak nação nian, nune’e, precisa nia matenek, dedicação, vontade no espírito de trabalho nebé di’ak ba bem estar povo no nação nian.
Adversário político la’os inimigo
Iha parte ne’e ha’u refere liu ba militante no simpatijante sira, katak adversário político ne’e la’os ita nia inimigo. Iha Timor, ema barak mai ho conceito ida katak, se nia cor la hanesan ho ha’u, significa nia ha’u nia inimigo. Iha doutrina democracia la hanorin konaba ne’e, buat nebé mosu iha princípio da democracia ne’e mak liberdade nune’e ema hotu iha liberdade atu participa iha vida política. Tanba ne’e, iha C-RDTL artigo (70) alinha 1o hateten: “O povo exerce o poder político através do sufrágio universal, livre, igual, directo, secreto e periódico e através das demais formas previstas na constituição”. Nune’e, povo iha direito tomak atu participa iha vida política, sem ameasa ho forma oi-oin. Maibé iha Timor iha político sira nebé mai ho interesse partidária forte, hodi considera adversário político hanesan inimigo. Significa laiha possibilidade mai ita atu dehan liberdade política.
Ita haré no rona ona iha média konaba situação atual nebé ita hasoru liu-liu, liga ho campanha partido político sira nian, violência nafatin mosu iha fatin balun ataca malu iha dalan, tuda malu, baku malu, aat liu tan mak usa atributo partido nian hodi ataca malu. Será que ne’e mak princípio da democracia? Nune’e ita bele mos considera militante sira seidauk adulto iha vida política ou sira la compreende liafuan adversário político ho inimigo. Ba sira so hatene de’it mak “la hamutuk ne’e inimigo”. Conceito ida ne’e maioria domina iha sociedade nia le’et, hodi halo sira moris iha de’it ho ideologia grupismo hodi taka aan ba ema seluk.
Conclusão
Líder di’ak mak ukun di’ak; ukun di’ak, povo moris di’ak. Iha eleição nebé sei mai mak determina povo nia destino, tanba iha momento sério ida ne’e mak povo ho conciência tomak hili nia liderança nebé sei eleito nu’udar Presidente da República. Mehi povo nian mak moris di’ak nu’udar ideal, nune’e povo elege nia confiança liu husi voto atu hodi hetan nia real aliás moris hakmatek, dame no domin nia laran. povo precisa presidente, la’os presente ka ausente. Povo tomak hein ho fuan mos no laran haksolok, presidente foun ida nebé mai ho espírito do trabalho nebé nakonu ho humildade, paciente no sabedoria, Presidente nebé mosu mai halo povo haksolok, la’os Presidente nebé mosu de’it mai povo alergia tiha ona. espera mehi povo nian sai realidade, princípio ukun nian tenke mai husi vontade popular katak conta hamutuk ho povo nia hanoin, povo nia susar no terus, liberdade tenke sai nafatin meios atu expressa povo nia sentimento no igualdade precisa aplica ba ema hotu, la’os ba ema balun de’it, lei tenke vale ba ema hotu, constituição tenke sai fundamento no iis moris povo no nação nian, programa geral do estado tenke beneficia duni povo, justiça tenke la’o ba oin no tenke combate corrupção, nepotismo, familiarismo, virus oi-oin nebé mosu atu sobu soberania povo nian labele husik liu. Presidente ba ema hotu, Presidente ba povo no Presidente ba Timor.
Husi: Flamerion dos Santos Exposto
(Estudante ISFIT – 40 Ano de Filosofia)
Referência
ARENDT, Hannah, O que é Política, trad. Reinaldo Guarany Kurt Sontheimer, 12a Ed., Rio de Janeiro Brazil, 2018.
ARISTÓTELES, Ética a Nicómaco, Trad. de Castro Caeiro, 4a Ed., Lisboa Portugal, 2012.
GUSMÃO, Martinho, Política Samea Ética malu falur, Artigo compilado de Martinho Gusmão, Colecção por José Fernandes da Silva no Instituto Superior ISFIT Dili, 2020.
GUSMÃO, Martinho (Ed), Sabemos, e podemos, e devemos vencer, DIOMA-Malang, 2018.
HESSE, Helgen, Á historia do mundo em 50 frase, trad. Maria Irene Bigotte de Carvalho, Rio de Janeiro, 2012.
MAQUIAVEL, Niccoló, O príncipe, trad. Ridendo Castigat Mores, Brazil, 1469-1527.
TOCQUEVILLE, Alexis, A democracia na América Leis e costumes, Trad. Eduardo Brandão, 2a Ed., São Paulo, 2005.
WEBER, Marx, A política como vocação, Trad. de Maurício Tragtenberg, Brazil, 2003.