INTRODUÇÃO
Iha biban ida ne’e, hau hakarak elabora artigo ida ne’e ho tema: JOVEM MAK FUTURO NAÇÃO NIAN: Oportunidades, Responsabilidades no Contribuição! Hodi hato’o hanoin ruma, hanesan jovem ida, ba maluk jovem sira seluk perante realidade nebé jovem sira hasoru. Basá, Papa Francisco sempre insiste jovem sira hodi dehan “jovem apóstulo ba jovem”. Liu-liu, hau hakarak halo comentário ruma konaba afirmação ida nebé sociedade sempre temi, hanesan oração badak nebé kmo’ok no kmanek liu ba jovem sira katak JOVEM MAK FUTURO NAÇÃO NIAN, hodi hare mos ninia desafios, responsabilidades no contribuição.
Sobretudo, hau hakarak halo observação crítica ruma ba realidade nebé jovem sira hasoru ohin loron, tamba Santo Padre Francisco husu mós ba jovem sira atu ida-idak hakiak iha nia fuan laran espírito crítico, hodi hatudu ita nia consciência crítica ba nação “Um jovem deveria ter sempre um espírito critico” (Christus Vivit, no. 190). Oinsá ita hanesan jovem hatudu nafatin ita nia consciência nebé nabilan, hodi hare ho matan kro’at ba realidade nebé jovem sira hasoru iha tempo ohin loron nian.
Hanesan cidadão ida, nebé goja mos direito Jovem nian iha rai ida ne’e nia leten; wainhira observa realidade actual jovem nian, sente preocupado no curioso atu hatene realidade sira ne’e, nia hun-abut iha nebé? Tan ne’e, hau sei usa questão nebé heroi inspirador bo’ot, poeta Borja da Costa usa iha nia poesia interogatória Kolele Mai nebé dehan “Sasa sa maka halo e se se los se?”, atu ita buka tuir razão saida los mak halo Jovem sira ohin loron, sai tiha nune’e no ema sese mak halo jovem sira sai nune’e?
Contudo, hau hakrak lori ita bo’ot sira ba hare hamutuk Exortação Apostólica Pós-Sinodal “Christus Vivit” do Papa Francisco aos jovems e a todo o povo de Deus. Atu ita bele hatene realidade no desafios Jovem sira nian, iha mundo ohin loron, no mos heroi bo’ot Nicolau dos Reis Lobato nia mensagem natal nian iha tinan 1974, nebé hameno hela responsabilidade balun ba jovem sira ohin loron, no hare mos contribuição saida mak jovem sira bele fo ba futuro nação nian. Ikus liu, oinsa ita bele hatur sentido kle’an ba liafuan kmo’ok ida ne’e: JOVEM MAK FUTURO NAÇÃO NIAN.
Tan ne’e, esquema simples nebé hau hatur hanesan dalan atu la’o tuir hodi haklean tema ne’e mak hanesan tuir mai: Jovem Nia Realidade, Jovem Nia Desafios, Juvem Nia Responsabilidade, Jovem Nia Contribuição, no Jovem Mak Futuro Nação Nian.
Nota Bene: Artigo ida ne’e, sei hatun ba dala tolu: Primeira Parte, sei koalia assunto rua konba Realidade Jovem Nian ho Desafios Jovem Nian. Segunda Parte, sei koalia konba Responsabilidade Jovem Nian. Terceiro Parte, sei koalia konba Contribuição Jovem Nian ho Jovem Mak Futuro Nação Nian no sei taka ho Conclusão no Recomendação balun. Boa Leitura e Bom Proveito ba Leitor sira! Jovem mak Futuro nação nian.
CONTEÚDO:
- Realidade Jovem Nian!
Em geral, iha fase ida jovem nian ne’e, buat nebé jovem ida hasoru no sente, la ses totalmente husi buat nebé maluk jovem sira seluk mós hasoru no sente. Tamba ne’e, ita hanesan jovem tenke loke matan hodi hare, usa kakutak hodi tetu realidade hotu nebé ita hasoru dau-daun no sei hassoru bebeik. Tamba, husi realidade sira ne’e balu lori kmeik no kro’at, maibe balun fali mos lori lição mai ita, atu fanun ita, hanorin ita atu aprende buat diak no hakribi buat a’at, hodi prepara-an ba ita nia futuro, basá nação Timor hein hela nia jovem sira. Contudo, hau hakarak lori ita bo’ot sira ba hare realidade balun, nebé ita bele observa ho matan rasik.
Ohin loron ita bele observa katak jovem barak mak moris abondado, marzinalizado, mentalizado no instrumentalizado. Basá, realidade hatudu mai ita katak Jovem barak mak lakon ona sira nia direção ida nebé clara, ba sira nia futuro rasik, hodi hanoin atu goja de’it sira nia presente, hodi haluha sira nia futuro, basá sira moris tuir moto moderno ida ne’e “moris ne’e goja kedas, mate la lori”. Sira haluha tiha katak moris ne’e rasik iha nia futuro, no futuro ne’e depende ba ita nia preparação no aproveitamento iha presente. Tan ne’e, hau concorda liu ho moto antigo ida ne’e “Loron Aban Hahu Ohin”. Ne’eduni, sé mak aproveita didi’ak loron ohin, nia sei sente resultado iha loron aban-bairua, hanesan salmo dehan “Sé mak kuda ho mata-bén sei ku’u ka sohi ho kasolok”.
Wainhira hare ba realidade todan no moruk, nebé jovem sira hasoru ohin loron, inan-aman sira ho laran triste no preocupa hodi bolu atenção ba jovem sira atu bele preparan-an didi’ak iha presente. Tamba, sira hare mos-mos katak futuro nação ida ne’e nian, iha Jovem sira nia liman no tula hela iha jovem sira nia kabás. Tan ne’e, hanesan inan-amaan sempre preocupa ho realidade nebé oan jovem sira hasoru dau-daun. Más, pergunta mak ne’e: Jovem sira atu prepara-an oinsá? No saida-saida mak jovem sira precisa atu prepara?
Ita bele observa mos katak, ohin loron ne’e Jovem potencial barak moris desanimado, desesperado no desorientado; tamba la hetan oportunidade atu continua sira nia estudo, basá condição economia família nian la suficente atu bele sustenta sira nia estudo. Maibé, questão mak ne’e, será que problema condição economia ne’e responsabilidade família nian de’it? Tansá estado la foti problema condição economia jovem sira nian, sai hanesan responsabilidade sério, atu garante futuro próspero nação nian?
Jovem potencial barak mos abondonado, tan de’it odamatan familia nian taka ba sira, odamatan partido nian taka ba sira, odamatan grupo nian taka ba sira. Ne’eduni, sira hela iha liur hodi assiste de’it saida mak acontece ba rai no povo ida ne’e. Barak mos, hakarak serviço, maibé compo do trabalho la iha; tama sai fatin-fatin buka serviço la hetan, tan fatin sira ne’e preenche kedas ona ho sira nia pakote, tan ne’e dalan la iha ba jovem potencial sira. Questão mak ne’e, jovem barak la escola no la serviço ne’e, iha impacto negativo ruma ba futuro nação nian ka lae?
Jovem barak mós la iha ona iniciativa rasik atu cria campo do trabalho ba nia an, la hanoin atu buka alternativo ruma hodi hetan osan atu hadiaa moris. Tan ne’e, sira depende totalmente ba estado, maibé susar liu tan qquando estado mos desinteresse ho sira nia teruss no susar, tamba sira nebé ukun mos hakarak aproveita de’it, hodi buka dalan oin-oin atu assegura de’it sira nia ukun, hodi la fo atenção ba jovem sira.
Jovem barak mos lakon ona coragem atu aproveita tempo hodi estuda ho sério, tan hamout-an demaisiada iha ambiente digital, no halo sira perde tempo barak liu, até halo sira nia kakutak la fresco ona, atu halo leitura ba matéria específica ruma nebé bele ajuda sira, hodi eleva sira nia especialidade iha area importante ruma. Questão mak ne’e, se jovem sira rasik, la aproveita didi’ak tempo no la iha creatividade atu cria serviço ba sira nia-an, oinsá ita bele dehan jovem mak futuro nação nian?
- Jovem Nia Desafios
Ohin loron, ita moris iha sociedade ida nebé Zygmunt Bauman bolu Sociedade Liquida katak sociedade ida nebé moris contrário ona ho sociedade sólida ka sociedade ida nebé moris abut metin ho nia valores culturais, maibé ohin loron ita moris ona iha sociedade ida nebé, la iha nia abut no la iha nia forma. Tan ne’e, lakon ona valores culturais sira nebé hori-uluk hori-wain ita nia bei-ala no amtuak sira tatoli hela mai ita, tamba buat hotu suli liu de’it hanesan bé nebé monu ba rai, ita la hetan ona be, maibé ita hetan de’it mak bokon. Husi ne’e, hanorin mos ita hotu liu-liu jovem sira, atu usa kakutak hodi halo adaptação nebé saudável, basá sociedade liquida ne’e, lori mos desafios lubuk ida ba jovem sira nia futuro. Ne’eduni, jovem sira tenke forte atu enfrenta situação hirak ne’e, tamba ita la bele escapa, maibé oinsá ita usa kakutak atu ita bele sobrevive perante desafios modernos.
Iha Santo Padre Francisco nia exortação Christus Vivit, sukit sai mos desafios lubuk ida nebé sai hanesan meik no kro’at hodi teri netik jovem sira nia futuro, no obriga jovem sira tenke hasoru iha mundo ohin loron nian. Tan ne’e, Santo Padre observa katak “Muitos jovems são mentalizados, instrumentalizados e utilizados como carne de canhão ou como força de choque para destruir, intimidar os outros. E o pior é que muitos se transformam em sujeitos individualistas, inimigos e difidentes com os todos, tornando-se assim presa fácil de proposta desumanizadoras e dos planos destruitivos elaborados por grupos políticos ou poderes económicos” (Christus Vivit, no. 73).
Santo Padre nia observação ne’e, la ses mos ho realidade nebé jovem sira hasoru iha Timor. Ohin loron ita observa katak, grupo oin-oin tama iha Timor no partido oi-oin haari iha Timor, hafalun-an ho buat mesak di’ak hodi dada jovem sira nia matan atu monu lalais, hodi hatudu katak sira iha interesse bo’ot ba Timor nia di’ak. Maibé, subar hela interresse política atu mentaliza jovem sira; Usa jovem hanesan instrumento atu sira bele atinge buat nebé sira hakarak; usa jovem sira hodi buka voto, usa jovem hanesan força de choque atu harahun unidade, atu cria instabilidade no atu intimida ema seluk. Sira hakiak mos fini individualismo iha jovem sira nia fuan laran, atu la bele preocupa tan ho valores di’ak sira nebé Timor iha hanesan; tulun malu, serviço hamutuk, fo neon no laran ba malu atu hari unidade no hametin paz iha sociedade. Maibé, mentaliza jovem sira atu hanoin de’it ba an rasik ho grupo nebé sira envolve ba, hodi hare maluk jovem seluk hanesan fuik no let.
Hari grupo oin-oin, hatama grupo oin-oin, ho sira nia intenção la di’ak, hodi halo barulho, no soran jovem sira atu sira nia política la’o nafatin. Grupo sira ho intenção hanesan ne’e, mak Nicolau Lobato bolu dehan forças contrárias ou reacionários “reacionários são os oportunistas […] os que tentam mover outros para o barulho, para a luta política” (Nicolau dos Reis Lobato, Sabemos, e Podemos, e Devemos Vencer, p. 81).
Hare realidade hirak ne’e, ita hotu nebé iha fuan sente la hakmatek. Nune’e, mos uluk Dom. Martinho da Costa Lopes dehan “Hau nia fuan sei la hakmatek, wainhira povo Timor sei terus no susar tan ba sistema política nian” (Lisboa, 1984). Tamba ne’e, jovem sira tenke neon matenek atu tetu didi’ak buat sira ne’e; jovem tenke matan moris, neon nain, tamba sira barak mai ho interesse atu sobu ita nia valores culturais sira, atu sobu ita nia unidade hanesan Maun-Alin no Bin-Feton, halo ita hare malu matan la mos, halo ita la respeito malu, halo ita tolok malu iha media, assalta malu iha fatin-fatin etc.
Santo Padre hare mos katak desfio ida nebé prejudica mos jovem sira nia vida mak colonialização ideológica (Christus Vivit, no. 78). Ida ne’e, liliu ba nação sira nebé riku, halo ba nação sira nebé kiak, sira nebé riku hakarak ajuda kiak ho dalan oin-oin hanesan fo bolso do estudo no fo campo do trabalho, maibé sira joga tama mos sira nia ideologia hodi sobu valores di’ak sira nebé nação kiak sira iha. Ida ne’e, nia impacto mos jovem sira, liliu sira nebé hetan oportunidade hodi sai ba serviço iha ema nia rai no sira nebé halao estudo iha ema nia rai. Conserteza, sira hotu nebé buka moris no escola iha ema nia rai, sempre ba ho hanoin di’ak atu hadia moris no hadia futuro, maibé mos sira fila mai la’os lori de’it buat di’ak, tamba ema nia ideologia influencia ona sira. Tan ne’e, sira balun hanoin di’ak no metin, la fácil atu monu, hetok sira aproveita ema nia valores di’ak sira, hodi mai hariku valores sira nebé ita iha no matenek nebé sira aprende hodi hadia ita nia rai.
Maibé, jovem balun nebé la metin iha princípio, fácil atu ema mentaliza ho ema nia ideologia. Ikus mai, halo jovem sira muda estilo da vida hanesan jovem Timor, nebé moris ho nia cultura no nia valores rasik. Husi ne’e, sira bele transmite mos hodi influência fali jovem sira iha rai laran, no fácil mos atu harahun ita nia valores di’ak sira nebé hakiak husi bei-ala no amtuak sira hanesan; respeito ema bo’ot, respeito ema ferik-katuas, moris hanesan ema educado, hatais hanesaan ema educado, tulun malu, respeita ita nia isin, respeita ema seluk nia isin, la hanoin at ba ema, hadomi malu, hare malu hanesan maun-alin no bin-feton etc. Tan ne’e, mak Dom. Carlos Filipe Ximenes Belo hare klean liu hodi dehan: “Ita manan ona liberdade, maibé ita lakon iha moral” (Lisboa, 2020). Agora, se ita la hanoin atu aprende buat nebé di’ak, maibé aprende fali buat nebé la di’ak atu estraga futuro Timor nian, oinsá ita bele dehan jovem mak futuro nação nian? Futuro atu hadia ka futuro atu sobu?
Desafio bo’ot ida tan, nebé santo Padre assentua mak ambiente digital; na verdade ambiente digital ne’e mos lori vantagem barak ba jovem sira atu aprende buat hotu-hotu ho lais liu, no bele acompanha situação rai liur no rai laran ho di’ak no lais. Maibé, Santo Padre hare mos katak “nem todos tenham acesso igual” (Christus Vivit, no. 86), katak depende ba ema nebé acesso, balun aproveita hodi aprende buat di’ak, maibé barak mos aprende buat a‘at no halo jovem sira sente hanesan “uma praça onde os jovems passam muito tempo” (Christus Vivit, no. 86), halo jovem barak perde tempo hodi aprende fali buat nebé la fo valor ba moris no lori efeito la diak ba futuro.
Tan ne’e, wainhira ita acompanha didi’a Avo Nana nia video ida nebé viral iha facebook, ita mos sente triste ho realidade nebé jovem sira hasoru perante invasão tecnológica “ami nebé tuan ne’e, hare laran triste no la contente liu, tamba labarik sira fila ba uma halimar de’it mak jogo ho mobile, ita lao ba mai rona mak; Whatsap, instagram, facebook, nebé ita hare hansan jovem sira ladun esforço atu estuda. Halimar de’it mobile até la toba, labarik sira sente gosto ho ida ne’e, maibé sei estraga labarik sira nia futuro” (Xanana Gusmão, palestra, 11/9/2022). Santo Padre mos observa katak, jovem barak mak mout iha ambiente digital no fácil atu monu ba solidão, manipulação, exploração no violência “De facto, ambiente digital é também um teritório de solidão, manipulação, exploração e violência” (Christus Vivit, no. 89).
Contudo, papa fo hanoin mos jovem sira katak ambiente digital ne’e política ema sira nebé iha poder tecnológico nian, tamba ne’e buat hotu nebé sira halo sempre subar sira nia intenção la di’ak hodi estraga ema nia vida no halo ema haluha mós katak vida ne’e dom ida “Podem levar-nos a esquecer a vida é um dom, que somos seres criados e limitados, podendo fácilmente ser instrumentalizados por quem detem poder tecnológico” (Christus Vivit, no. 82). Tecnologia halo ema moris de’it iha ilusão no halo ema ingnora dignidade ema nian, hodi haburas pornografia no usa feto nia isin hodi halo promoção atu hetan lucro “tecnologia usada desta maneira cria uma realidade paralela ilusória que ignora dignidade humana” (Christus Vivit, no. 90)
Halo mos jovem sira sai dependete, tamba ne’e la iha internet sira sente hanesan la iha vida, no halo sira lakon contacto ho mundo real ka concreto, hodi lakon ona conversa ho ema seluk nebé besik no susar atu troka hanoin ha ema seluk nebé besik iha sorin-sorin “Os meios de comunicação digitais podem expor ao risco de dependência, isolamento e perda progressive de contacto com a realidade concreta, dificultando o desenvolvimento de relações interpessoais autênticas” (Christus Vivit, no. 88). Halo mos jovem sira lakon vontade atu halo leitur, tamba jovem sira nia vida tomak identico tiha ho telemovel. Tan ne’e, sira toba ho telemovel, hader ho telemovel; la iha tempo atu halo leitura, balun halo leitura liu husi telemovel, maibe leitura iha telemovel ho livro físico ne’e diferente; livro físico ne mais efetivo do que digital, basá digital ne’e iha tendência barak nebé atu dada ita nia concentração.
Desafio bo’ot ida tan mak, jovem barak la iha vontade atu ba escola no jovem barak mak la continua estudo, tamba condição economia familia nian la suficiente atu sustenta sira. Tan ne’e, quando sira remata S1, sira hanoin processo estudo ne’e, remata ona iha S1 no la iha esperança tan, atu continua ba S2 no S3. Ne’eduni, sira hare S2 ho S3 ne’e hanesan nakukun bo’ot ida nebé falun metin sira no hasusar sira atu hare hetan no hare burus sira nia futuro hanesan S2 ho S3. Ne’eduni, wainhira sira remata S1, direitamente buka ona serviço oan ruma, atu bele serviço netik hodi sustenta moris.
Mesmo que, tinan-tinan governo haruka hela jovem balun ba continua sira nia estudo, maibé mínimo liu, tamba jovem potencial barak liu mak buka dalan ba serviço iha ema nia rain. Jovem barak mos iha interesse atu concore iha boluso do estudo, maibé dala barak mos seleção la regorosa, tamba barak liu de’it husi familia, partido no grupo etc, hodi taka mos oportunidade ba jovem potencial sira seluk. Tan ne’e, Jovem potencial barak mos tenke hapara sira nia estudo, hodi trata documentos atu bele ba serviço iha ema nia rain. Ita imagina, Jovem barak mak la escola no jovem barak mak husik escola hodi ba buka serviço iha ema nia rain, oinsá ita bele dehan Jovem mak futuro nação nian?
Ita observa mos-mos katak estado la foti responsabilidade ida nebé sério ba educação atu garante jovem sira nia futuro, basá Orçamento Geral do Estado ba educação ne’e ki’ik demais. Sé Orçamento ba educação ki’ik hanesan ne’e, oinsá ita garante futuro jovem sira nian hodi defende futuro nação nian, tamba futuro nação nian depende ba educação. Tuir pedágogo brasileiro ida naran Paulo Freirre dehan “educação muda o homem e o homem muda o mundo”. Tamba ne’e, educação mak sai chave atu garante recursos humanos, nebé qualidade hodi servi no defende rai ida ne’e nia futuro.
Ita hare mos-mos katak Jovem barak mak remata ona S1, maibé moris abandonado tan la hetan serviço, basá campo do trabalho mos la iha. Wainhira, campo do trabalho la iha fácil atu jovem sira envolve iha grupo oi-oin nebé bele mos lori efeito la di’ak ba nação, hodi provoca mos barulho; tamba la iha campo do trabalho nebé suficiente atu acomula jovem sira. Ao passo que, husi campo do trabalho ne’e, bele minimiza jovem sira atu halo barulho iha cidade laran, no perturba ema seluk, basá depois de sai serviço tenke descança tamba isin kole, no tenke prepara energia ba loron aban nian, atu bele hala’o serviço ho di’ak.
Quando governo la fo atenção sério ba campo trabalho iha rai laran, jovem barak mak la hetan serviço, então fácil atu grupo sira nebé tama iha Timor, mentaliza jovem sira no usa sira hanesan instrumento atu halo barulho situação. Questão mak ne’e, tansá, mak governo la halo política atu cria campo do trabalho nebé efectivo iha rai laran, maibé halo fali política ida nebé la di’ak ba futuro nação nian, hodi haruka jovem potencial barak sai ba rai liur, hodi hakotu mos sira nia estudo. Programa estado nian, atu garante futuro nação nian mak ida ne’e?
Nota Bene: artigo ne’e, sei iha nia continuação, nebé sei kolia assunto importante ida konba Jovem Nia Responsabilidade tuir Nicolau Lobato. Hanesan mos lia-menon responsabilidade heroi sira nian, atu jovem sira tula iha kabás hodi hulan leku-lekun. Responsabilidade saida-saida de’it mak Nicolau Lobota hakarak hameno ba Jovem sira ohin loron? Keta haluha acompanha acompanha, atu hatene ita nia responsabilidade hanesan Jovem Timor oan ida, tamba Jovem mak Futuro Timor nian!
José Felix Camilo
[Estudante do III ano da Faculdade de Teologia no ISFIT]