DILI, 07 de setembro de 2022 – Sua Excelência Secretário Estado Comunicação Social (SECOMS), Sr. Merício Juvinal dos Reis “Akara” hamutuk ho reitor ISFIT, Pe. Justino Tanec no estrutura sira hala’o lançamento ba livro ho título “Filosofia Política e Ética: Platão a Axel Honneth uma crítica social”, nebé hakerek husi estudante finalista nain 8 husi faculdade filosofia ano letivo 2021; atividade ne’e hala’o iha loron quarta-feira semana ne’e iha salão ISFIT.
Iha ocasião intervenção husi S.E. SECOMS ba iha lançamento livro ne’e, nia aprecia tebes ho iniciativa no passo di’ak ida nebé mak estudante balu hatudu ona liu husi hakerek, nune’e nia congratula equipa organizadora ba livro ne’e no hakerek nain sira; nia mos hatutan liu tan katak pronto atu colabora ho atividade académica sira nebé ligado ho produto intelectual hanesan discussão no hakerek sira.
“Evento ruma nebé mak liga ho produto intelectual, ha’u pronto atu ba, tanba ita hakarak desenvolve Timor ne’e ho klean, organizado no sistemático ita precisa duni ema matenek atu hatene ukun no organiza uluk nia aan hafoin mak ukun ema seluk, ponto ida ne’e mos ha’u haré imi hakerek iha livro ne’e”, haktuir Sr. Akara.
Iha cerimonia lançamento ne’e, Pe. Justino Tanec iha nia intervenção agradece tebes ba caráter familiaridade nebé hatudu husi S. E. SECOMS, hodi disponibiliza nia tempo atu bele marca presença no hala’o lançamento ba livro refere. “Ita precisa conciente katak ita aprende ideias filosóficas barak, matenek barak ne’e mai husi filósofo hirak nebé husi hela sira nia obra sira liu husi hakerek; nune’e, ko’alia ne’e fácil maibé oinsa atu organiza hodi hakerek ne’e maka precisa caridade académica ida nebé ita precisa hala’o nafatin atu bele tulun ita nia geração sira nebé sei mai”, nia hatutan hodi fó importância ba cultura da leitura no cultura escrita.
Iha sorin seluk, Vice reitor III – assunto estudantil, professor Elídio A. Guterres nebé hanesan mos editor ba livro refere, agradece mos ba S. E. SECOMS ho nia equipa nebé responde ona convite ba lançamento livro ne’e; wainhira apresenta livro ne’e, Vice Reitor ne’e haktuir katak husi nia parte hakarak aprecia estudante hirak nebé consegue concretiza mehi ida ne’e, basá ida ne’e hanesan mehi ida nebé nia rasik hanoin ona atu hahú halo iha tinan hira ba kotuk maibé situação balu nebé la ajuda, nune’e tinan ne’e maka foin concretiza.
Iha apreciação husi S.E. SECOMS ne’e mos Sr. Merício haktuir tan importância husi estudo filosófico nian hodi hatutan katak, “Ita boot sira tem que orgulho tanba entre Timor oan sira hotu, ita boot sira hahú apreende filosofia, tanba hanesan ita hatene katak filosofia ne’e hanorin ita atu hatene klean assunto sira, nune’e ema mak apreende filosofia sempre mai ho hanoin crítico no questiona problema hotu nia abut, nune’e imi precisa critica nafatin saida mak ami governante sira hala’o la loos, imi tem que fo hanoin bebeik mai ami se lae ami bele haluha aan; ha’u hanoin ida ne’e mak halo filosofia sai hun ba materia hot-hotu, nune’e ita boot sira apreende matéria ida nebé nu’udar ciência hotu nia hun”.
Atividade ne’e hetan participação husi estudante interno no externo sira balu, comitiva SECOMS nian no docentes ISFIT sira. Relaciona ho livro ho título “Filosofia Política e Ética: Platão a Axel Honneth uma crítica social” nebé hetan lançamento husi S.E. SECOMS, acompanha husi Vice Reitor III-Assunto Estudantil no Reitor ISFIT ne’e, hakerek husi estudante hirak hanesan: Noé Xacala Taveres, João Gilberto Oqui, David Martins, Nério R. S. Freitas, Ezaquiel dos Reis, Aderito Ferreira, Octávio Marques, Zebedeu Mota de Araújo; editor sira maka hanesan: Professor Elídio Agusto Guterres, Pe. António Q. Do C. Do Balino no Pe. Domingos Xavier.
Média-ISFIT
Zeferino Mesquita de Almeida