DILI – Assistente Técnico Estudantil do Instituto Superior de Filosofia e de Teologia (ISFIT) Dom Jaime Garcia Goulart, Fatumeta-Dili, Sr. Américo da Cruz, hateten, semana ne’e nia laran ISFIT sei hahú halo preparação hodi festeza Valentine day nebé tuir calendário sei selebra iha dia 14, segunda semana oin.
“Ohin Gabinete Reitor Assunto Estudantil cordena ona ho Senado Geral ISFIT hodi convoca encontro ida ho senado faculdade Filosofia no Teologia nian atu koalia liu-liu kona ba assunto sira nebé ISFIT sei hala’o hodi selebra valentine day ne’e,” katak nia ba jornalista Média-ISFIT nian hafoin remata husi encontro entre Gabinete Reitor Assunto Estudantil ho Senado no estrutura senado período 2022 nian, iha salão ISFIT Fatumeta-Dili, Tersa-feira (08/02) ne’e.
Assistente Técnico Estudantil ne’e acrescenta tan katak, husi encontro nebé realiza ona koalia liu-liu kona ba assunto tolu nebé importante hodi bele halo preparação sira di’ak liu tan maka hanesan Job description, Realiza Seminário no mos aividade sira ba Valentine day ne’e rasik.
“Hanesan ita hatene katak Valentine Day ne’e loron domin nian nebé ita haré ema barak espressa domin iha loron ne’e liu husi atividade oi-oin iha fatin nebé oi-oin maibé, ISFIT hanesan instituição académica ka instituição católica ida nune’e ohin ami deside ona ponto culminante ne’e mak ita sei realiza de’it seminário hodi partilha ba malu conhecimento sira no durante iha seminário ita bele anima mos ho atividade sira seluk hanesan apresentasão ruma husi classe sira hanesan música coral, poesia, partilha esperiência do amor, coral tradicional, banda música no sei iha mos animação balu husi banda Alcatraz,” informa Sr. Américo.
(Média ISFIT)
Reportagem: Cornelio Mota