ISFIT HALA’O LIMPEZA GERAL IHA ÁREA CAPITAL DILI

DILI (Média ISFIT) – Estudante husi Instituto Superior de Filosofia e de Teologia (ISFIT), Dom Jaime Garcia Goulart Fatumeta-Dili, sexta-feira ne’e (05/02), hala’o ação social ho atividade limpeza geral iha área sira capital Dili nian.

Atividade ne’e realiza ho objetivo atu cuida no prevene nafatin Dili hanesan capital nação nian no mos tamba haré ba dadus husi ministério de saúde nian nebé hatudu katak oras ne’e dau-daun moras dengue sa’e aas tebes hodi afeta mos ba labarik no foin sa’e sira nia vida.

Tuir Vice-Reitor III ISFIT Assunto Estudantil nian, Sr. Elídio Agusto Guterres, hateten, ISFIT kaer metin nafatin espírito husi Encíclica Papa Francisco nian nebé kona ba Laudato Sí, oinsa hadomi ecologia sira mundo ne’e nian.

“Nune’e ohin voluntariamente ita mai koko no hatudu espírito tuir Encíclica Papa Francisco nian oinsa atu hadomi ita nia ambiente liu husi atividade sira hanesan halo limpeza ba fo’er sira nebé soe arbiru iha ita nia rain ida ne’e liu-liu iha área sira capital Dili nian atu nune’e capital ida ne’e bele sai furak no mos nafatin,” afirma Vice-Reitor III ba jornalista sira iha fatin destacamento limpeza geral nian, Bairo-Pité, Dili.

Atividade limpeza ida ne’e sai hanesan programa anual ISFIT nian nebé cada semana estudante sira sei tun ba tereno hodi halo ação social hanesan ohin halo limpeza geral husi ponte Maloa, Bairo Mamura, Hudi-Laran no to’o iha Fatumeta, nune’e semana tuir mai sei hala’o fali ho tipo nebé la hanesan.

Iha fatin hanesan, chefe senado geral ISFIT, Francisco da Ressureição Xavier Barros, hatutan tan katak, tinan ne’e dadus husi saúde sira hatudu katak ema sira nebé afeta ba moras dengue ne’e nia número sa’e maka’as tebes kompara ho tinan kotuk, nune’e causa ba moras ne’e ida mos husi fo’er nebé ema soe la tuir ninia fatin nune’e bele produs mos susuk barak husi lixo sira ne’e.

“Tan ne’e ami prevé daudaun problema nebé ohin loron sociedade enfrenta, nune’e ami halao ami nia limpeza geral no agora dau-dauk ne’e ita hotu hatene katak problema dengue ne’e caso sa’e maka’as entaun ami mai serbisu iha ne’e la’os atu hatudu ba público katak ami hamoos fo’er, lae. Maibé, ami hakarak fanun fali conciência público nian atu bele conciente fali katak causa ba moras dengue nebé mak ita nia maluk barak moras no lakon vida ne’e ida mos husi lixo ne’e rasik,” informa nia.

Tuir informação nebé Média ISFIT ascesso katak, loron da-huluk ba limpeza geral ne’e responsabiliza husi classe 3 ano de Filosofia no 3 ano de Teologia, inclui mos religioso, religiosa no leigos sira nebé mak hala’o estudo iha ISFIT, nune’e horário tuir mai ba responsábel limpeza geral nian sei halo rotação ba cada classe sira tuir horário nebé estabelece ona no atividade refere sei hala’o semanalmente iha fatin nebé la hanesan.

Media ISFIT

Estudante Cornelio Mota