Pe. Quenser: “Sai Senado Estudantil nudar oportunidade atu aprende no atu treino-an sai liderança”
DILI- Instituto Superior de Filosofia e de Teollogia (ISFIT) D. Jamie Garcia Goulart, Fatumeta, halao cerimonia tomada de posse ba estrutura foun senado faculdade Filosofia no Teologia ba periódo 2022-2023 nudar parte ida husi senado geral ISFIT nian, iha salão ISFIT, Fatumeta, Dili iha loron Quinta 20/01/2022.
Salão Instituto Superior de Filosofia e de Teollogia (ISFIT) D. Jamie Garcia Goulart, Fatumeta, Dili.
Foto: Média ISFIT
Participa iha cerimonia ne’e Vice-Reitor I assunto Academico Pe. António Quenser hato’o nia parabens no mos fo coragem ba Senado Estudantil katak sai Senado Estudantil nudar oportunidade atu aprende no treino sai lideransa.
“Imi hirak nebé eleito ba iha estrutura Senado Estudantil tanto husi Faculdade Filosofia, Teologia no Senado Geral ida ne’e nudar oportunidade atu aprende no atu treino-an sai liderança nebé di’ak ba futuro uma-kreda no ba nação” hateten Pe. Quenser.
Husi tomada de posse ida ne’e chefe senado filosofia no teologia estudante Junaro Calistro no Domingos Marques lori nia estrutura tomak hato’o sira nia profundo gratidão ba Vice-Reitor III assunto estudantil Prof. Elidio Agusto Guterres, Assistente tecnico estudantil Sr. Américo da Cruz no ba chefe senado geral Francisco da Ressureição no estrutura tomak ba confiança nebé deposita ba sira hodi derige actividade tomak estudante filosofia no teologia nian durante periódo 2022-2023.
“Ita hotu hatene katak simu kna’ar foun ne’e laos previlêgio ida nebé halo ita ocupa ou hetan posição exelente ida husi ema seluk, maibé ida ne’e hanesan confiança ida nebé exige responsabilidade, compromisso no comitmento” tenik chefe senado filosofia estudante Junaro.
Chefe senado teologia estudante Domingos mos reforça liu tan katak atu buat hotu la’o di’ak mak precisa ita hotu nia participação no colaboração “Atu ita nia Istituição ida ne’e bele la’o ho diak no iha progresso necessita teb-tebes ita hotu nia participação no colaboração tuir knaar nebé ita ida-idak iha” haktuir nia.
Francisco da Ressureição hanesan Chefe Senado Geral mos hato’o nia agradece wain ba chefe foun senado faculdade filosofia no teologia nian ba sira nia disponibilidade nune’e espera husi parte estudante nian ba oin ita bele la’o di’ak liu no intensiva liu tan ho dalan serviço hamutuk, colaboração mútua ho entidades hotu iha ISFIT ida ne’e.
Nune’e mak Prof. Elidio mos encoraja liu tan ba chefe no estrutura sira hotu katak saida de’it mak imi hato’o ona ne’e sai nudar passo dahuluk atu hala’o serviço, tamba serviço hanesan campo da actualização de ideia e conhecimento nune’e serviço no atualiza ba saida mak imi hatene no hanoin ba Instituto ida ne’e nia di’ak, ba Igreja no mos ba nação nia diak.