Liafuan Dahuluk
Existéncia casamento entre feto no entre mane, hamosu polémica iha timor, tamba sociedade timor concidera hanesan buat foun ida ba sira. Tamba desde uluk tempu beiala sira, tempu portugues no Indonesia, sira nunka rona ema feto ho feto ou mane ho mane hola malu nudar fen no laen. Agora timor ukun an nudar nação ona mak foin mosu no ema timor oan mak hamosu ida ne’e no halekar iha timor. Claro hamosu reagem oin-oin, balu aceita no balu fali la aceita ho casamento modelo ida ne’e. Sira nebe membro no cor ida deit ho grupo ida ne’e, aceita, fo suporta malu no fo sasin ba casamento modelo ne’e. Sira nebe kontra la aceita ho liafuan trata ho expressa emocional. Mas, duque ita trata malu ho liafuan nebe ladiak no hamosu konflito no inimigo ba malu, diak liu ita conpreende ita nia posição tamba sa mak la aceita modelo casamento ne’e ho fundamento ida nudar ema timor nebe maioria Católica, moris ho nia cultura no lisan nudar ema timor iha Rai Timor.
Tamba ne’e artigo ida ne’e nia objetivo mak, atu fo conpreenção ba timor oan nebe sarani católica, moris ho nia cultura, ho nia lisan hanesan ema timor oan. Atu sira bele compreende sira nia posição la aceita casamento modelo ida ne’e ho fundamento ida nudar católico no timor oan, tamba sa mak sira la concorda modelo casamento ida ne’e iha Rai Timor Lor-Sae.
Timor Leste nudar nação foun ida nebe nia sociedade moris iha pluralimo cultural, ideologia no religião. Maibe hanesan ema Timor no maioria Católica casamento modelo ida ne’e inaceitável, tamba kontra Maromak nia obra, kontra moral, kontra cultura no lisan timor, kontra natura humana no kontra lei.
1). Kontra Maromak Nia Criatura
Desde hahu kedas “Maromak halo ema mane no feto” (Gen. 1:27). Nia la halo mane deit no mos feto deit maibe mane no feto. Maromak hateten tan “Ladiak se mane deit”, tamba ne’e Nia halo mos feto (Gen. 2:22-23) atu sira nain rua complete malu. Depois Maromak haraik benção no lia tun ba sira dehan “hahoris ba, hodi hakonu rai tomak” (Gen. 1:28). Maromak Nia ordem Iha ne’e claro, katak Nia haraik bensa ba feto ho mane, laos feto ho feto ka mane ho mane. Nia objetivo mos claro, atu sira bele hetan oan hodi hatutan jerasaun contínua labele kotu. Ita imagina, se grupo ida ne’e mak domina, depois sira kaben entre feto ho feto ou mane ho mane deit, hanoin to’ok futuro humanidade sai oinsa? Especie ida ema, sei mohu no animal mak sei domina ema nia fatin tamba ema la hahoris ona, no jerasaun ema nian sei remata. Tamba sira nega Maromak Nia ordem, atu “hahoris hodi hakonu rai”. Papa João Paulo II, (1994), iha nia carta ba familia sira, fo atenção ba parte hotu-hotu, Igreja ka estado atu protese ba feto ho mane nebe hamutuk harí familia, iha mundo ohin loron ne’e. Tamba haré hosi fenómeno ohin loron nebe acontece dadaun iha ameaça boot ida ba “comunidade humana sei mout iha situação ida nebe perigo, ameaçado atu lakon ka mohu” (João Paulu II, 1994, n. 11). Wainhira ema nega nia natureza humana nudar ema feto no mene.
Animal sei domina ema nia fatin tamba to’o ohin loron animal sei hatene nafatin sira nia natura, sira la duvida ba sira nia natura, tamba ne’e to’o minute ida ne’e, laiha animal ida mak atu kaben ne’e, inan ho inan mak buka malu ou aman ho aman mak buka malu, maibe aman ida ho inan ida mak buka malu atu kaben hodi hatutan sira nia jerasaun. To’o ponto ida ne’e ita bele halo analogia ida katak, ema beik liu fali animal no animal matenek liu fali ema. Tamba animal nebe nia neon laiha maibe sei hatene nia natura, ita ema nebe iha neon no hanoin maibe la hatene nia natura nudar ema. Ida ne’e acontece tamba ema nia arogancia. Nia hanoin katak, nia matenek liu hotu, to’o nega Maromak Nia criatura, e matenek demais liu to’o la hatene nia natura rasik nudar ema, feto no mane.
Animal sei mantein nafatin sira nia natura hanesan aman no inan, tamba ne’e atu kaben sempre aman bukan inan ou inan buka mak aman. Tamba ne’e conceito ida kaben ne’e só bele aplica deit ba aman ida ho inan ida nia hamutuk. Kaben sei la acontece entre inan ho inan ou aman ho aman deit. Buat nebe hanesan aplica mos ba ita ema. Kaben ne’e sei bele acontece entre feto ida ho mane ida. Ita labele usa conceito kaben se entre feto ho feto ou mane ho mane. Tamba entre sexo nebe hanesan sei la acontece casamento ka kaben. Kaben só bele acontece entre feto ida ho mane ida. Mane ho mane labele no feto ho feto deit mos labele. Tamba lia fuan kaben, ita só bele usa ba feto ida ho mane ida hamutuk nudar fen ho laen. Sira hahu forma familia liu hosi promesa ida, iha neba “mane ho feto entrega an ba malu no simu malu” (GS, art. 48). Livro genesis ajuda ita atu hare lia lós ida ne’e, “Hori uluk kedas Maromak halo mane ho feto, Tan ne’e mak mane sei husik nia aman ho nia inan hodi moris hamutuk ho nia fen; sira nain rua sei sai isin ida deit,” (Gen. 2:24 no Mt. 19:4). Se feto ho feto, ita atu bolu ida nebe mak sai laen no ida nebe mak sai fen? Tamba buat rua ne’e hanesan deit. Nune’e mos ba mane ho mane, ida nebe mak sai fen no ida nebe mak nudar laen? E lori efeito aat ba labarik sira nia kakutak, tamba lori complicado boot ba labarik sira nia posição atu identifica sira nia an ba se, feto lolos no mane lolos, ou iha klaran?
Feto bele sai inan maibe nia labele sai aman. Nune’e mos mane so bele sai aman maibe labele sai inan tamba impossivel nia hahoris oan. Feto mak bele hahoris, mane labele. Feto bele hahoris wainhira caben ho mane ida, no mane bele sai aman ba oan ida wainhira caben ho feto ida. Ne’e ita ema nia natureza mak ida ne’e. Laos deit ita ema maibe animal hotu-hotu mos nia natureza mak ida ne’e. Tamba Maromak halo buat hotu fahe kedas ona tuir nia par nebe diferente, tamba Nia hakiak buat hotu ho método separação. Rai separa ho lalehan, naroman separa ho nakukun, bé no tasi separa ho rai maran, manas no malirin, feto no mane, aman no inan (ba animal) (cf.Gen. 1:1-25).
Maromak hakiak animal tuir nia especie no ida-idak ho nia par ho mos fo ida – ida nia identidade, inan ho aman (cf.Gen. 1:11-13; 24-25). Nune’e mos ema, Maromak fo kedas sira nia identidade, ida mane no ida seluk feto . Animal aman ho inan hamutuk hatun jerasaun. Ema feto ho mane fo an ba malu no simu malu hodi sai ida deit hamutuk hahoris oan hodi hatutan jerasaun continua iha mundu ne’e. (cf. João Paulu II, 1994, n. 11). Tamba Maromak bolu sira atu sai aman no inan, atu serbisu hamutuk ho Maromak hodi hakiak moris foun. Tamba ne’e feto no mane, físicamente mesmo que diferente maibe iha capacidade atu moris hamutuk iha lia lós no domin. Maibe, ema ho nia matenek foti an nega lia lós no nega domin ida ne’e, hodi kontra Maromak nia obra ne’e. Iade ne’e iha possibilidade bele hamosu buat hotu sei sai sabraut, no especie humana ameaçado sei hotu (terancam akan punah). Tamba sira hanoin deit sira nia an, hodi buka deit prazer ba nia an, no contra nia vocação atu colabora ho Maromak liu hosi casamento feto ho mane hodi hatutan jeração no hahoris imagem foun Maromak nian iha mundo ne’e (cf. João Paulu II, 1994, n. 8, 9).
Hanesan uluk acontece iha Sodoma ho Gomora, tamba ema nia foti an no hahalok la tuir ona Maromak Nia hakarak, Nia hatun ahi halo mohu ema no buat hotu iha tempu neba (cf.Gen. 19 ss). Se mane ho mane ka feto ho feto mak kaben, ita rasik mak cria diluvio hamout ita nia especie, sei sai confusão boot iha sociedade hanesan iha tempu torre Babel, no ita rasik mak sei cria Sodomo ho Gomora hodi harahun ita nia especie humana iha mundu ne’e liu hosi atitude nebe kontra lia lós no domin, hodi nega nia vocação atu hahoris Maromak nia imagem foun. Ema nia geracão labele hakotu ho ita nia arrogancia, maibe tenke continua no hatutan nafatin. Ba ida ne’e. Robert Mugabe, presidente Zimbabwe nia liafuan dehan, “Ami precisa mak iha continuidade iha ami nia raça, no ida ne’e mai hosi feto sira, la’os mai hosi homo sexualitas. Laós hosi João ho João ou hosi Maria ho Maria, la’os!” (Radio ZDK, 2015). Ida ne’e claro katak hosi feto ida ho mane ida mak bele hatutan geração.
2). Kontra Moral
Kontra moral katak kontra buat nebe lós no kontra Maromak Nia hakarak. S. Paulo iha nia carta ba Romano sira hatudo momos saida mak Maromak hakarak no saida mak Nia lakohi. Tamba ne’e “Maromak sei hatudu nia laran nakali hasoru ema fiar laek no laran aat, nebe tan sira nia laran aat, halakon lialos” (Rom. 1:18). “Basa sira troka tiha lialos konaba Maromak ho lia bosok hodi hahi“ (25), […]. Feto la ba ona ho mane hanesan bai-bain maibe halo buat oi-oin nar-naran deit; no mane sira mos, husik tiha feto sira, buka mane maluk hodi halo buat nebe hamoe ema” (Rom. 1: 26-27). Tamba ne’e, sira ne’e lakohi simu Maromak sira nakonu ho buat hotu nebe aat, “hirus Maromak , foti an, gaba an, loko an, matenek atu halo aat” (Rom. 1:29-30).
Hosi crítica ne’e claro katak casamento feto ho feto no mane ho mane, buat nebe kontra moral religião no kontra Maromak nia hakarak. Hahalok ida ne’e laós foin mak mosu maibe existe ona desde uluk tempo antigo. Ida ne’e claro, hosi S. Paulo nia crítica ne’e katak feto ho feto no mene ho mane moris hamutuk nudar fen ho laen ne’e la lós, no iha tempu neba kedas hahalok la lós ida ne’e ema kontra ona. Maibe ohin loron buat nebe la lós ida ne’e ema obriga atu halo lós fali, buat nebe la normal ema halo fali normal. Halo confusão deit sociedade nia kakutak, li-liu labarik no foin sae sira nia hanoin. Tamba ne’e labele normalisa buat nebe la normal desde uluk, labele halo lós fali buat nebe desde uluk la lós ona. Ida ne’e mak kontra moral. Ita labele bosok an no bosok sociedade ho buat nebe la lós hori uluk hori wain. Tamba vida moral ne’e laós ita mak foin halo, maibe moral ne’e ita ema nia natureza desde moris mai. Ita ema ne’e moris mai iha ona tendencia atu halo buat nebe lós no diak iha kedas ona “por natureza o homem é bom” (J.J. Rousseau, 2009), sociedade mak estraga buat diak ne’e, hanesan acontece dadaun ne’e iha ita nia sociedade agora. Nega buat lós halo lós buat nebe sala tuir moral, religião no cultura.
3). Kontra Kultura no Lisan Timor
Kultura nebe deit maske mais simples liu, feto ho feto ka mane ho mane kaben ne’e la existe. Tamba ne’e se ohin loron ema hakarak hatama feto ho feto ka mane ho mane hamutuk ne’e hanesan casamento, sira tenke cria conceito foun ba ida ne’e, tamba se temi kaben ka casamento, ema nia kakutak ne’e hanoin kedas ona mane ida ho feto ida mak bele halo casamento ka kaben. Tamba ne’e sexo hanesan nebe hamutuk, sira nia hamutuk ne’e la merese atu temi casamento ka kaben, no mos la merse atu temi familia, tamba kaben no hari familia ne’e feto ida ho mane ida hamutuk hodi hetan oan hari familia foun. Feto ho feto ka mane ho mane, sira nia hamutuk ne’e hanesan kolega deit nebe hela hamutuk iha uma ida, maibe laos familia tuir kultura no tuir lisan Timor.
Ho matan kultura Timor nian mak hare casamento modelo ida ne’e, halo confusão boot, tamba oinsa mak katuas sira lia nain atu tur hamutuk hodi koalia. Katuas sira konfusão, se mak umane no se mak mane foun. Se mak lori karau no se mak lori fahi. Ita moris iha confusão nia laran. Se buat ida ne’e mak ita legalisa iha Timor, ita tenke muda buat hotu. Iha parte religião, nudar católica maioria iha Timor, nia Biblia tenke muda hotu, ida ne’e bele?, ho grupo ida foin moris horseik nian ne’e. Kultura no tradição umane mane foun iha Timor tenke muda hotu bele?. Se buat ne mak acontese ita Timor halakon ita nia kultura, no ita nia identidade nudar ema Timor. Ita sei moris sem identidade, tamba ita halo tuir fali ema rai liur nebe laiha ona nia espiritualidade kultural no laiha ona nia kultura no nia lisan.
Tamba ne’e importante tebes tenke hatene didiak ita nia kultura ita nia lisan nudar ema timor, atu labele kultura seluk invada ita nia identidade no halakon ita nia identidade. A culltura é a alma de um povo, tamba ne’e ita tenke tane as nafatin ita nia kultura, hamoris no desenvolve nafatin atu Timor ne’e Timor nafatin, labele sai fali timeuro, timaus, timamer. Quando ita metin iha ita nia kultura ita sei sai povo ida nebe forte, no nação ida nebe metin. Nasaun sira nebe metin iha sira nia kultura no sira nia identidade mak hanesa China, Korea, Japão no Israel, ema sira ne maju lalais. Sira la imita arbiru ema nia kultura, sira hatene taes ida nebe mak bele tuir no ida nebe mak labele. Ita Timor lae, facil los atu imita ema nia kultura, e lahatene nia diak ka aat tuir deit. Ita fraku los iha ita nia kultura. Ita Timor hanesan ema lao rai ka estrangeiro mak ukun ita. Hametin cultura hametin identidade nudur nação. Ita quando lé Biblia ita hare oinsa ema Israel halo teologisasi ba sira nia kultura, tamba ne’e to’o ohin loron ema sira ne’e metin no forte iha mundo nia le’et. Ita Timor bele halo, depende ita hakarak ka lae.
4.) Kontra Natura
Normalmente caben ne’e mane ho feto, maibe se acontece feto ho feto ka mane ho mane mak hamutuk halo casamento, ida ne’e anormal no kontra natura nudar ema. Ema kontra nia natura rasik hodi buka deit gostu ba nia an. Tamba sira nia hamutuk ida ne’e nia objetivo laós atu hetan oan hodi hatutan jerasaun, maibe sira nia objetivo atu hetan deit gostu isin nian ou buka deit prazer ka gozo (Aristotele, Politica, 2002). Ida ne’e mak kontra natura humana no kontra Maromak nia criatura hanesan koalia tiha ona iha leten. Mane ho feto Maromak halo no hraik benção ba sira atu hahoris oan no hakonu rai (cf. Gen. 1:22-23). Tamba ne’e natureza humana nudar feto no mane tenke defende nafatin atu humanidade ne’e labele lakon iha futuro. Se ita ema nega ita nia natureza hanesan ema – feto ho mane, animal mak sei domina iha ita ema nia fatin.
Ida ne’e bele acontece tamba iha rai liur sira iha ona lei katak animal hanesan asu no busa hola ona parte ka sai ona membro familia. Hosi fenómeno ida ne’e, bele acontece iha futuro mai “casamento” entre ema ho animal, wainhira ita ema nega ita nia natureza hanesan ema criatura Maromak nia. Casamento entre sexo hanesan la preence critério hanesan fen ho laen. Tamba atu casamento tenke preence critério ka dimenção rua ne’e, dimenção unitiva (fen ho laen hamutuk) no dimenção procreativa (hahoris oan). Casamento sexo hanesan iha deit dimenção unitiva, laiha procreativa. Tamba ne’e sira nia unitivo ka hamutuk ne’e atu buka deit felicidade, maibe sira nia felicidade tuir Aristotele, (2002) iha deit nivel ida primeira, nivel baixo liu ne’e, katak buka deit prazer ka gostu isin lolon nian deit. Tamba ne’e sira nia felicidade ne’e la perfeito (tidak sempurna) tamba kontra natura.
Ita respeito no reconhece sira nia direito ba felicidade no direito atu expressa sira nia domin, maibe tuir Papa Fracisco, dehan “amo aquele pessoa vejo com amor de Deus Pai, que nos dá tudo […] quem ama evita falar muito de si mesmo” (AL, n. 96, 97). Katak liu hosi domin nebe lolos, la arrogante no la buka hahi deit gostu isin lolon nian mak bele hetan felicidade nebe lós. La usa ka hahi pricipio hedonismo ala Aristipus no Epicurus (G. Reale, D. Antiseri, 2003) katak buat nebe lós ne mak hetan gostu isin lolon nian, tamba ne’e ema buka meios oioin atu hetan gusto ba nia isin lolon ka prazer deit, buat hotu nebe halo terus mesmo ke nia fim ne’e diak sira sei hases an hosi ne’e (Fagothey, 2000). Iha realidade ema nia moris ne’e la ses hosi terus no susar, laiha moris ida mak ksolok deit no mos terus deit, maibe susar no terus sempre acontece. Ida ne’e mak ita ema nia natureza iha mundu ida ne’e.
5.) Kontra Lei
Uluk wainhira iha Estado Unidos America legalisa lei casamento entre gay ka homo sexual iha sira nia nação, presidente Zimbabwe Robert Mugabe, dehan nune’e, “se Presidente Obama legalisa casamento feto ho feto no mane ho mane iha nia nação, hau sei la permite casamento diabólico ida ne’e existe iha hau nia Nação”. Iha parte seluk nia discurso balu ameasa ba gay sira, “Hatama ba kadeia casal gay sira, no fo liberdade wainhira entre sira balu hahoris ona oan” ou entre sira ne’e ida, isin rua ona (ida ne’e possivel)?. Maibe iha Timor ita nia nai presidente mak apoio uluk no sai sasin ba “casamento” modelo ida ne’e, mesmo que kontra lei civil Timor nian, Kontra lei canon Igreja católica nian, (can. 1055). No mos kontra lei moral religião Católica no lei adat trdicional Timor nian. Tuir lei sira ne’e, casamento ho sexo hanesan la existe no la vale iha Timor (lé Pe. Julio Crispin nia artigo). Tamba ne’e tuir P. J. Crispin, sira nia casamento ne’e iha Timor lei la protese, no jovem ruma gosta sira ne’e ida no wainhira sira mos hakarak sira bele caben fali tamba iha lei timor nia oin modele casamento ida ne’e la reconhece no la existe.
CONSIDERAÇÃO IKUS NIAN
Existéncia homosexualitas iha Timor, laós problema, laiha discriminação ba sira, ema moris iha respeito malu nia laran, hadomi malu. Parese iha familia balu iha uitoan desitendimento balu maibe laos problema boot hanesan ema hanoin ohin loron. Sociedade simu sira laiha discriminação, sira sempre iha oin wainhira iha festa bobot Igreja nian, sira orna Igreja laran. Laós deit Igreja maibe iha evento bo-bot sira iha sociedade nia laran ema sira ne’e sempre iha oin halo serbiço, tein iha dapur. Sociedade moris hamutuk ho sira dame no paz. Maibe iha problema wainhira ema lori ideologia LGBT hosi liur mai hatama iha Timor no haketak grupo ne’e hosi sociedade, no hosi convivéncia normal iha sociedade nia le’et ba fali grupo foun, ho nia ideologia foun hodi buka meios barak atu domina sociedade Timor nia cultura, nia religião no nia lei.
Grupo LGBT nia ideologia claro no momos katak kontra doutrina Igreja católica nia fuan, cultura Timor nia fuan lei civil no lei tradicional Timor nian. Maibe problema mak tamba sa mak ita nia nai ulun balun apoio no suporta sira hodi buka meios atu normalisa buat nebe la normal? Cultura no lei civil no lei moral tradicional timor nian bele muda tuir sira nia doutrina ka ideologia? Parte religião nian, Biblia bele muda tuir sira nia ideoloogia ka doutrina?
Religião no moral laós ita mak halo ka forma horseik ka horibainrua, maibe conceito ida religião no moral ne’e ema nia natureza kedas desde ema ne’e moris mai iha mundu ida ne’e. Tamba ne’e mesmo que ema crítica ema hanehan ho ideologia oioin atu halakon religião maibe religião nunka lakon to’o ohin loron existe nafatin no aumenta barak nafatin tamba buat ne’e natureza ema nian. Ne’e duni ema ne’e lakon hotu ona mak moral religião mos sei lakon. Durante ema ne’e sei iha moral religião mos sei existe nafatin.
Grupo LGBT laós sciedade ka sarani católica nia inimigo, sira mesa ema pontencial iha area oi-oin, ita respeita sira hanesan Maromak nia criatura, ita la simu mak sira nia negação ba Maromak nia obra desde hahu, no negação ba ema nia natureza nudar ema feto no mane, nudar Maromak nia obra. Feto ho mane la’os ema nia obra ou apa ho ama nia obra. Tamba ne’e inpossivel atu nega ka muda.
BIBLIOGRAFIA
BIBLIA SAGRADA, Versão dos textos originais, Difusora Bíblica Fraciscanos Capuchinhos, Lisboa/Fátima, 2000.
LIAFUAN DIAK BA IMI, Don Bosco, Dili, 2004.
KONSILI VATIKAN II, Konstitusi Pastoral tentang Gereja Dalam Dunia Modern Gaudium et Spes, art. 48.
ARISTOTELE, Politica, a cura di Carlo Augosto Viano, Testo Grego a Fronte, BUR, Classici Greci e Latini, Millano, 2002.
FOGOTHEY, Austin, Right And Reason, Secon Edition, Ethics in Theory and Practice Based on the Teaching of Aristotele and St. Thomas Aquinas, TAN Books, Chalotte North Carolina, 2000.
FRANCISCO, Amoris Laetitia, A alegria do Amor, Segundo Exortação Apostólica do Papa Francisco, Paulus Editora, 2016.
JOÃO PAULO II, Surat Kepada Keluarga-Keluarga, Seri Dokumen Grejawi No. 34, Departemen Dokumentasi Dan Penerangan KWI, Jakarta, Mei 1994.
____________, Exhortasi Apostolik Familiaris Consortio, (22 Nopember 1981), 69: AAS 74 (1982, 165.
REALE, G., & ANTISERI, D., História da Filosfia, Filosofia Pagã Antiga vol. 1, Titulo original Storia della filosofia – Volume I: Filosofia antico-pagana, Editrice LA SCUOLA, Brescia, Italia, 1997, 3a Edição, PAULUS, 2007.
MUGABE , Robert, Wawancara di Radio ZDK, 2015. Disponivel iha, KOMPAS. Com, 7 Juli 2021. Acesso iha 7 de augosto, 2024.
ROSSEAU, J.J., Emile, Or, On Education, tr. By Barbara Foxley, The floating, Press, 2009.
Luis Gouveia Leite,
Doscente Filosofia iha ISFIT Fatumeta Dili
E-mail, luisgoveia@yahoo.com