DILI – Associação Desportiva Académica (ADA) ISFIT organiza deposto amigável entre estudante sira husi Universidade da Paz (UNPAZ) ho ISFIT, ho intenção atu hametin liu tan laço de amizade iha área desportiva nian entre instituição rua; atividade desportiva ne’e hala’o ho modadalidade rua: futebol ba mane no basketball ba feto no mane, nebé realiza iha recinto ISFIT nian, loron Domingo, 08 de maio de 2022.
Iha atividade ne’e hetan participação husi parte senado ISFIT nian, nomeadamente vice reitor sira, funcionário sira ISFIT nian no mos estudante sira; husi parte UNPAZ nian hetan mos participação husi docente balu, jogadores no estudante sira. Iha abertura ba jogo ho modalidade hirak ne’e, professor Elídio Guterres nebé assume cargo nu’udar vice-reitor III assunto estudantil iha ISFIT, haktuir katak jogo ne’e ho caráter amizade nian nune’e ho motivo atu hametin relação di’ak entre instituição rua nian, liliu iha parte desportiva.
Iha sorin seluk presidente ADA-ISFIT, Sr. Américo da Cruz hatutan tan katak “atividade desportiva ne’e hanesan momento di’ak ida atu cria laço de amizade a nivel institucional; ba oin ADA-ISFIT buka nafatin atu laos para de’it ho UNPAZ maibé ko’alia mos ho universidade no instituto superior sira seluk hodi harí laço de amizade liu husi evento desportivo sira hanesan ne’e”. Nia mos agradece ba UNPAZ nebé bele simu convite ne’e hodi bele mai hala’o jogo amigável ne’e, nia haktuir nafatin programa associação nian katak sei iha mos tarjeto ba instituição sira seluk nebé mak hatama ona iha programa anual associação nian.
Husi parte UNPAZ nian, diretor extracurricular, Sr. Quintiliano Fernandes Barros haktuir katak “objetivo husi jogo ida ne’e maka hametin laço de amizade iha área desporto nian, no mos haklean estudante sira nia talento iha desporto refere; instituição hotu consege estabelece ona ADA, nune’e husi parte ami nian (UNPAZ, red) mos koko cria jogo amigável sira ho modalidade futebol, basquetebol no futsal; ami contente tanba ISFIT bele iha iniciativa hodi convida ami; mensagem maka estudante sira husi instituição rua ne’e maka precisa desenvolve nafatin talento sira atu bel compete iha nivel regional, nacional no bele mos internacional, atu hatudu katak Timor mos bele”.
Resultado husi jogo amigável ba modalidade hirak ne’e mak hanesan: iha modalidade futebol mane, ISFIT manan ho score 4-2; iha modalidade basketball ba mane, ISFIT manan UNPAZ ho score 51-31; basketball feto ISFIT manan ho score 19-13. Atividade ne’e animada tebes husi estudante sira instituição rua nian, la’o ho di’ak ho ambiente amigável tebes husi hahú no remata.
Média-ISFIT
Zeferino Mesquita