Pe. Abito: “Transforma hahalok Tuan ba Hahalok foun”

Dili (Média ISFIT) – Atu tama ba celebração Festa Páscoa nian, ita ida-idak precisa prepara ita nia aan halo didi’ak, liu-liu prepara fuan no klamar nebé mos liu husi transforma ita nia hahalok tuan sira nebé la di’ak ne’e husik ona ba kotuk hodi moris fali ho hahalok foun liu husi presença roman foun Cristo redentor Nian iha ita hotu nia leet.

Padre Abito Brites hateten lia hirak ne’e, wainhira dada lia ho Média ISFIT iha Salão ISFIT Fatumeta, quinta-feira semana ne’e (31/03), hafoin remata husi atividade retiro quaresmal nian ho Tema “Eucaristia” nebé hala’o durante loron ida ho estudante leigo no leiga sira 10 to’o 40 ano Filosofia nian nebé durante ne’e hala’o sira nia estudo iha Instituto Superior de Filosofia e de Teologia Dom Jaime Garcia Goulart (ISFIT) Fatumeta-Dili.

Pregador ba retiro ne’e hatutan tan katak, atu halo transformação ba ida-idak nia aan ne’e la’os iha momento balun de’it maibe precisa hola iha conciência nudár sarani nebé di’ak hodi halo transformação radical durante iha moris tomak.

“Liu husi retiro ida ne’e atu ita hotu bele reflete fali ba ida-idak nia aan hodi hamate ita nia aan husi ita nia gosto sira isin nian no ita koko husik, atu ita bele forte nafatin iha Maromak Nia domin no ita koko atu halo transformação ida ne’e iha ita nia moris tomak ho conciência, la’os deit iha momento sira hanesan ne’e no liu tiha ita continua moris fali ho toman tuan nian, ne’e lae, maibe tenki haka’as aan hodi luta ba ita nia aan ida ne’e iha moris loro-loron nian,” encoraja nia.

Tamba Jesus Cristo ida nebé mai iha mundo hodi saran ninia aan tomak ba ita liu-liu ba ita hirak nebé hanaran ema humana, ema nebé sala na’in. Tamba ne’e molok atu tama ba iha loron semana Santa nian, ita buka atu haka’as aan hodi la’o ba to’o dalan ksolok tuir Maromak Nia hakarak, ho ida nee deit mak ita bele conserva no lori iha ita ninia aan hanesan sarani diak ida iha ita nia moris loro-loron, liu-liu ba festa pascoa ida nebeé ita sei selebra iha semana oin.

Entretanto, durante iha retiro refere hetan mos participação máximo husi estudante Leigo ho leiga no mos docente sira ISFIT nian no hafoin retiro continua kedan ho Confessão no Selebração Eucaristia nebé preside husi Padre Abito Brites.

Média-ISFTI
Cornélio Mota
Bárbara Clarina Mendonça