Pe. Luis Gouveia Leite
Liafuan dahuluk
Estado Timor Leste nia plano ba desenvolvimento passo ida ba oin liu hosi harí infra-estrutura atu desenvolve desporto iha Timor Leste, liu hosi harí estádio Nacional, nia fatin mak area Lagoa Tasi Tolu. Razão hili fatin ida ne’e público sedauk hatene lolos, tamba sa? Parese razão estrategia, técnica, no sinbólica atu unifica nia visão desenvolvimento ho espirito nacionalismo? Ida ne mos sedauk claro mai ita público.
Desenvolvimento ema hotu hakarak, maibe oinsa mak desenvolvimento ida nebe bele fo resposta ba povo nia problema ba moris diak. Desenvolvimento nebe toca, ba foco (sasaran), labele naran halo deit tamba iha osan, se lae povo labele sente nia utilidade ba sira nia moris. Dala ruma bele acontece, ho razão desenvolvimento, elite politico sira ho companha aceita malu atu fahe deit projeito ba malu hodi hetan lucro, atu harico deit grupo kiik oan ida. Ikus mai povo só admira deit projeito nia físico maibe la goja buat ida. Questão mak ne’e, tamba sa mak tenke hili Tasi Tolu sai fatin ba projeto boot ida ne’e? Artigo ida ne’e, atu fo deit opinhãot ba questão hili fatin Tassi Tolu?
Tamba sa mak Tasi Tolu?
- Iha Area nebe Luan ?
Ita hare nia area, Tasi Tolu fatin luan ida nebe hela besik Cidade Dili, besik Aeroporto, besik Estrada protocolu no facil atu ema ba acesso waihira iha evento jogos sira no mos evento cultural seluk. Maibe Area luan nebe besik Cidade Dili laós deit Tasi Tolu. Parte Oriente iha Dolok Oan, Metinaro Area lua barak. Parte Weste, parte Liquiça, Maubara Area luan sei barak mos. Maibe tamba sa mak tenke Tasi Tolu? Fatin hirak ne’e besik hotu Dili, tamba ne’e razão acessibilidade no conetividade ba fatin seluk além de Tasi Tolu nebe besik Dili, facil atu acesso, laiha problema ba população atu asiste jogos no atividade cultural seluk.
- Hakibi’it Economia, Desenvolve Povo nia moris
Projeito ida ne’e waihira realisa, sei tulun no desenvolve vida economia ema lubuk ida nian. Sei aranja emprego ba ema barak, sei desenvolve infraestrutura base sira iha area refere, hanesan dalan, be mós no energia nebe diak. Maibe ita haré realidade agora ne’e, Dili ne’e mak sai centro ba desenvolvimento. Desenvolvimento hotu maioria harí iha Dili deit, ita haluhan area ka fatin seluk nebe mos percisa desenvolve. Se ita nia razão tamba besik Aeroporto, besik dalan protocolo, ida ne’e razoavel liu ita harí projeto boot ida ne’e, iha Baucau, Malina, Suai no Oecusse, tamba iha fatin sira ne’e mos iha Aeroporto, iha dalan protocolo besik tan ho Nação visinho Indonesia ecepto Baucau mak dook hosi batas.
Governo tenke hanoin ona atu harí Segundo cidade ida ba Nação Timor Leste, labele desenvolvimento hotu-hotu bou deit iha Dili laran, Porto Internacional iha Dili, Aeroporto Internacional iha Dili, Super Mercado sira iha Dili, Loja bobot sira iha Dili, Hospital boot no Clinica sira iha Dili, Univercidade sira iha Dili no atu harí tan Estadio Internacional iha Dili Tasi Tolu. Cidade Dili ne’e ita compara karik ho Ró ida, Ró ne’e besik mout dadaun ona tamba Container boot barak demais liu ona tula iha nia leten.
Ita compreende katak Capital Nação iha nebe deit, nia sai centro ba: economia, política no militar maibe, ita labele haluhan desenvolve mos Distrito seluk iha Timor Leste. Atu nune’e hamenus ona Urbanisasaun mai Cidade Dili. Se ida ne’e mak Governo la tau matan, tinan 10 oin mai ita lahatene sirculação população iha Cidade Dili laran sai oinsa? Claro ke ema sei aumenta, kareta no motor sei aumenta barak tan maibe Cidade Dili laran mak sei nafatin hanesan agora ne’e. Tamba ne’e diak liu Estádio Internacional harí iha fatin seluk.
Imagina deit, Estádio iha Tasi Tolu, atu ba Tasi tolu ema tenke liu hosi Estrada nebe atu acesso mos ba Aeroporto, dalan nebe hanesan Porto mos usa lori Conteiner sira mai Loja sira iha Dili laran, dalan ida ne’e mos mak ema hosi Liquiça, Maliana, Kupang no Atambua mai liu iha neba atu too Dili. Ida ne’e mak Governo la halo manejamento didiak sei acontece agravamento ida nebe halo ema estres aat liu tan. Desenvolvimento nebe ita halo atu povo bele goza ho haksolok, maibe bele sai fali desastre ida ba moris diak iha futuro. Haré deit ita nia experiéncia iha visita Amo Papa Francisco mai Timor, missa iha Tasi Tolu iha 2024, Dili laran ita la’o la livre ona. Ne’e iha 2024, imagina iha 2034 mai claro ema, Kareta no Motor barak liu tan. Se Governo hanoin halo Estrada andar tolu ka hat bele resolve situação sira ne’e. Ponte ida atu acesso Aeroporto, ida seluk ba Porto no ponte ida tan ba acesso Estádio. Ho ida ne’e bele resolve situação karik?
- Estádio nia utilidade ba oin iha futuro
Hanesan temi ona iha leten, katak projeto Estádio ida ne’e nia prospeto ba oin, atu hakbiit no desenvolve economia local povo nian iha futuro. E depois atu bele ajuda no hafacil oinsa hala’o jogos internacional sira. Maibe ida ne’e labele acontece no realisa deit iha Dili. Diak liu tan realisa iha Distrito seluk, hodi nune’e bele hakibi’it economia povo sira nebe iha Distrito. Sira nia Guest House, sira nia Hotel, Ristorante bele folin hodi diversifica vida economia iha Timor laran. Aranja serviço ba sira nebe hela dook hosi Capital, labele buat hotu centralisa iha Dili deit.
Desenvolve desporto no hasae qualidade jogador sira iha modal oioin hanesan atlético sira, foot ball no seluk tan. Maibe jogador sira ne’e la’os deit iha Dili, iha Distrito sira mos jogador barak, joven barak mak iha capacidade ba desporto maibe la desenvolve tamba laiha facilidade nebe ajuda atu desenvolve sira nia capacidade no skill desporto nebe iha. Tamba ne’e Estádio labele harí bou malu deit iha Dili laran.
Ho harí estádio meio ida atu dada investor no desenvolve setor Turismo. Seitor ida nebe importante tebes atu hasae povo nia economia no hasae income mos ba nação no hamoris seitor produtivo sira. Tamba ne’e precisa loke desenvolvimento ida ne’e sai hosi Cidade Dili atu hamoris no desenvolve Distrito seluk nia vida economia. Ho razão hirak ne’e mak hau pessoalmente la aceita harí Estádio iha Tasi Tolu Dili.
- Valor Cultural, Histórico no Espiritual
Tasi Tolu iha nia valor cultura no histórica nebe klean. Culturalmente, area ida ne’e sai importante ba rito tradicional local nian, no iha nia valor no símbolo de identidade nebe importante ba sociedade nebe hela iha area refere. Preserva ba fatin tradicional no cultura ne’e importante atu bali nafatin identidade no cultura Timor Leste nia nebe mai hosi beiala sira. (TATOLI).
Tasi Tolu iha mos nia valor histórico, tamba Tasi Tolu fatin nebe militar Indonesia sira oho ema no soe iha neba. Liliu jovens sira nebe iha Massacre Santa Cruz nebe lakon too agora la hetan nia rate, balu ema soe iha neba. Ho razão ida ne’e mak iha 1989, amo Papa João Paolo II, mai visita Timor, Igreja hamutuk ho governador Timor nian Ir. Mario Carrascalao prepara no hili fatin ihaTasi Tolu atu halo Missa, ho razão ida katak, iha neba mártiro da Pátria barak mak ema soe. Papa mai atu reza mos ba sira nia klamar iha fatin ida ne’e. Ita fiar katak sira nia klamar iha Lalehan tamba ne’e sira tulun ita ohin loron Timor hetan ukun an. Tamba ne’e Tasi Tolu fatin nebe iha nia valor spiritual ba povo Timor Leste tomak. Bé iha Lagoa ho nia natureza nebe hakmatek, Tasi Tolu koalia mai ita konaba Esperança, konaba dame, konaba Nação Timor Leste nia viagem too ohin loron. Maibe ho projeto Estádio ida ne’e iha risco boot atu hases nia valor cultura no religioso nebe iha nia an.
- Valor Ecologia meio ambiente
Tasi tolu ho nia ecositema nebe único, inclui nia bé mer nebe sai fatin diak ba manu oioin bele moris, flora no fauna nebe única iha nia laran. Construção boot bele haruhun habitat natural nebe iha ou bele atrapalha sículo ecosistema nebe moris iha nia laran.
Projeito boot sempre cria limbah, sólido ka líquido, waihira companha la maneja ho diak bele halo poluição ba Lagoa no Rai iha area refere. Nia efeito bele halakon hotu ecosistema sira nebe moris iha nia laran. La’os deit ida ne’e maibe area ida ne’e mos iha nia função nebe importante tebes atu prevene mota no ta’is bé nebe tama iha laran.
Iha bé laran iha mos ahu ruin nebe importante tebes atu protese ecosistema sira nebe iha nia laran hanesan, ikan no animal seluk nebe hela iha neba. Tamba ne’e preserva ba fatin ida ne’e importante tebes atu protese animal moris sira nebe iha nia laran (Timor-Leste). Tamba ne’e wainhira harí projeto boot Estádio Internacional iha area ne’e, ameaça boot ida ba ecosistema sira iha neba.
Ohin loron tamba osan no ho razão desenvolvimento, ema haluhan valor histórico, mártiro sira nia luta fakar ran ba rai ida ne’e, no povo ida ne’e. Em nome de desenvolvimento no progresso ema halo projeito boot oioin, maibe grupo kiik oan ida mak goja hosi desenvolvimento ne’e. Harí projeito bobot maibe la resposta ba problema povo nia moris, tamba lucro hosi projeito boot sira ne’e ema elite politico no companha boot sira mak goja. Povo kiik mai hare no admira deit ho projeito nia físico nebe iha, maibe sira la goja. Sira iha foho lao ain tanan nafatin, leba sira nia modo no aifuan lao ain mai too Mercado. Sira nia Estrada rural aat nafatin no balu sedauk iha tan, maibe ita iha ona auto Estrada, iha ona Aeroporto no atu harí tan ona Estádio ho nivel Internacional iha Dili Tasi Tolu.
- Halakon Beleza Natureza
Estrutura airin no moru ho beton bobot sira bele halakon lanscap visual nebe natural no hakmatek. Situação hakmatek, meditativa no spiritual tasi Tolu nian sei bele lakon ho atividade sira jogo hanesan: hakilar no haklalak parese acontese mos trata malu tolok malu no aat liu tan ida ne’e bele mosu.
Loron matan dader no lorokraik nian nebe leno halo Lagoa Tasi Tolu nia furak, nia lakan nabilan, hatudo nia Beleza natural, fo menssagem dame no hakmatek hodi cria situação mágica ida nebe ita labele explica ho liafuan, só ho ita nia presensa direta mak bele senti nia dame, nia hakmatek no nia hakoak ba ita nia klamar.
Tasi Tolu, area bé hosi debu tolu ho nia bé no raihenek nebe furak. Nia furak no Beleza natural sira ne’e bele lakon ho moru no beto bobot hatidin an iha nia oin.
Diak liu harí monumento símbolo identidade Timor Leste nian ida, husik halo jardim nacional ida nebe nakloke atu povo bele pasiar hare Lagoa nia furak no nia Beleza natural. No dada atividade turisca hosi liur no local hodi hamoris economia local povo nian.
- Conclusão
Hili Tasi Tolu sai fatin atu harí Estádio, la’os Tasi tolu deit mak fatin nebe besik liu Dili no facil atu acesso Aeroporto no Estrada, maibe iha mos fatin seluk nebe iha besik Cidade Dili, no iha Distrito seluk. Bele hili fatin seluk nebe besik Cidade Dili ou diak liu tan iha Distrito (sai hosi Dili), hodi bele desenvolve no hamoris economia iha Distrito sira seluk. Dili desenvolvimento tatuk malu demais ona, tamba ne’e precisa loke desenvolvimento ba Distrito seluk. Desenvovimento tenke iha nia visão ida nebe bele hakuak povo barak nia hakarak no nia interese, atu nune’e garante nia continuidade, liu hosi respeita valor histórico no cultura povo nian. Ida ne’e mak estrategia ida nebe diak atu desenvolve Timor Leste tuir nia plano. Ikus mai, se maneja ho diak, projeto ida ne’e la’os deit Estádio ida maibe sai símbolo progresso do desenvolvimento nacional iha mundo Internacional nia oin, no sai espaço ba Unidade ba povo Timor Leste tomak.
Tamba ne’e desenvolvimento hotu tenke iha nia perioridade: primeiro, atu hadia povo nia moris, la’os atu buka deit lucro hodi hariku deit grupo elite balu deit. Segundo, desenvolvimento la’o maibe respeita nafatin povo nia identidade cultural, labele tamba osan estraga no harahun fatin sira nebe comunidade ida fiar sai nudar sira nia símbolo de identidade. Terceiro, desenvolvimento ne’e diak, maibe tenke tau atenção ba meio ambiente ka vida natureza, tamba ita ema nia moris ne’e parte ida hosi natureza, ema ho natureza interdependencia. Estraga natureza katak estraga ita nia moris rasik.
Desenvolvimento ida ne’e tenke iha nia transparancia, iha participação hosi público, no iha nia gestão ida nebe sustentavel atu nune’e iha nia uso, povo tomak bele sente. Se lae Estádio ida ne’e, sai mnumento mamuk ida nebe ocupa deit fatin no estraga, laiha nia beneficio ba povo nia moris iha futuro.
Docente ISFIT, Fatumeta Dili, hanorin História da Filosfia Contemporânea. Email: luisgoveia@yahoo.com.