Dili – Reitor ISFIT, Pe. Justino Tanec participa iha cerimónia lancamento livro manual aluno educação moral no religião católica ba ensino secundário 100 ano da escolaridade. Cerimónia ida ne’e rasik organiza hosi Comissão Nacional da Educação Católica Timor-Leste (CONECTIL) iha loron 11 fulan dezembro tinan 2024 iha salão ISFIT.
Livro Manual Aluno Educação Moral no Religião Católica nebé sei usa ba ensino secundário 100 ano da escolaridade, nudár manual ida nebé elabora hosi equipa CONECTIL. Presidente executivo CONECTIL, Pe. António Quencer do Balino do Carmo hato’o nia agradecimento ba Maromak liu-liu ba providência ba realização cerimónia ida ne’e. Pe. António Quencer mós agradece ba convidado de honra sira hotu nebé mak mai participa iha cerimónia importante ida ne’e. Tuir Pe. António Quencer katak buat nebé mak halo ita hotu halibur iha fatin ida ne’e tanba ita hotu preocupa ba Educação. Educação nudár questão ida nebé fundamental no importante tebes ba construção estado.
“Educação Moral no Religião desempenha papel fundamental iha formação caracter no construção valores iha individuo no sociedade Timorense. Educação moral no religião haklean liu tan kona-ba moris no ajuda cultiva virtude sira: honestidade, compaixão, pascência, justiça, respeito, no seluk tan. Religião concerteza hanorin importância hosi domin no perdão. Tanba ne’e, atu responde ba necessidade fundamental ba educação moral, caracter no religiosa; igreja católica ho autoridade Conferência Episcopal Timorense (CET) liu hosi papel no serviço CONECTIL nian estabelece currículo formal ida hodi hanorin no forma Timor oan sira”, haktuir Pe. António Quencer iha ninia discurso.
Pe. António Quencer hatutan liu tan katak ohin Kreda Católica afirma nia contribuição ba Estado Timorense ho lancamento manual ida ne’e. Tanba ne’e molok termina, Presidente executivo ne’e mós agradece ba ema hot-hotu no liu-liu ba parte hotu nebé mak suporta ona serviço CONECTIL nian hodi bele termina manual aluno ida ne’e. Tuir Pe. António “Momento ida ne’e sai hanesan momento ida osan mean atu ita partilha. Laos de’it partilha informação maibé partilha mós ita nia experiência no ita nia preocupação kona-ba educação iha Timor”.
Iha momento hanesan, Vice-Reitor II, assunto administração e finanças ISFIT nian, Pe. Francisco da Costa sai mós hanesan orador principal ba Oratio Sapientiae iha cerimónia ida ne’e hodi hato’o nia apreciação no comentário ba manual refere, liu-liu kona-ba tématica principal rua nebé mak descreve iha manual ida ne’e hanesan Consciência no Decálogo. (Média ISFIT)