REITOR ISFIT SIMU OFICIALMENTE BOLSEIRO NAIN TOLU HOSI UAJ

Dili – Reitor ISFIT, Pe. Justino Tanec simu oficialmente bolseiro nain tolu nebé mak termina ona sira nia estudo nivel mestrado iha Universitas Atma-Jaya, Jacarta, Indonésia. Recessão ida ne’e realiza iha loron 18 fulan novembro tinan 2024 iha ISFIT.

Bolseiro nain tolu ne’e mak hanesan Francisco de Assunção Cárceres, mestrado iha área psicologia, Serilio Verdial M. Borges, mestrado iha área psicologia no Inácio Loiola da Costa O. Maia, mestrado iha área direito. Sira nain tolu rasik nudár alumni ISFIT nebé hetan oportunidade hodi ba continua sira nia estudo mestrado iha UAJ.

Reitor ISFIT, Pe. Justino Tanec, representa Civitas Académica ISFIT nian, oficialmente simu sira iha ISFIT hodi expressa ksolok ba sucesso nebé sira nain tolu atinge ona. Reitor hato’o bemvindo no bom regresso ba sira nain tolu, tanba sira bele termina ona sira nia estudo no ohin bele fila-fali mai hodi servi iha ISFIT. Reitor mós agradece ba responsabilidade sira nian hodi cuida didi’ak confiança nebé ISFIT fo ba sira hosi hahu estudo too bele remata ho di’ak.

Iha momento hanesan, bolseiro nain tolu mós hato’o sira nia agradecimento ba ISFIT, liu-liu agradece ba confiança no acompanhamento tomak durante sira hala’o estudo iha UAJ no ohin bele fila-fali mai ISFIT. Bolseiro nain tolu ne’e mós expressa sira nia esperança atu fo an tomak hodi servi no apoio serviço sira iha ISFIT.

Depois de recessão oficial hosi Reitor, bolseiro nain tolu continua hasoru malu hodi halo apresentação no partilha experiência no informação ruma hamutuk ho funcionário sira ISFIT nian. (Média ISFIT)