ESTUDANTE SEMINARISTA NAIN 30 SIMU MINISTÉRIO LEITORADO NO ACOLITADO

Dili – Seminarista diocesano nain 30 simu ministério Leitorado no Acolitado iha sira nia viagem vocacional nian. Ministério hirak ne’e simu liu hosi Celebração Eucaristia nebé preside hosi Dom Virgílio Cardeal do Carmo da Silva, SDB iha loron 4 fulan novembro tinan 2024 iha capela Seminário Maior Interdiocesano São Pedro e São Paulo, Fatumeta.

Seminarista diocesano hirak ne’e hanesan mós estudante ISFIT nebé mak oras ne’e daudaun hala’o hela sira nia estudo iha faculdade teologia. Hosi seminarista nain 30 ne’e, sira nebé simu ministério leitorado hamutuk nain 13 no ministério acolitado hamutuk nain 17.

Arcebispo Metropolitana da Arquidiocese de Dili, Dom Virgílio Cardeal do Carmo da Silva, SDB haktuir iha nia homilia katak celebração eucaristia ida ne’e sai hanesan momento ida ba ita hotu atu agradece ba Maromak, liu-liu ba graça no di’ak hotu nebé Maromak haraik ona ba formador no formando sira hotu durante tinan tomak ida ne’e. Além de ida ne’e, Iha eucaristia ida ne’e mós ita hotu sei sai sasin ba grupo boot nebé sei simu ministério leitorado no acolitado.

“Nudár leitor, la’os atu lee de’it maibé buka atu medita didi’ak no haklean uluk Maromak nia futar liafuan. Molok atu haklaken ba sarani sira, di’ak liu buka atu moris tuir uluk lai liafuan nebé ó sei haklaken. Acólito sira buka hakas-an didiak halo ó ninia knaar iha altar. Nune’e, bele tulun ó hodi servi no tulun mós ó atu cresce iha ó nia fiar no caridade hodi hametin no haburas liu tan Santa Kreda wainhira o servi”, hatutan Cardeal iha ninia homilia.

Baseia ba leitura bíblica iha eucaristia ida ne’e, Cardeal hatutan liu tan katak ita bele foti ponto rua importante nebé mak S. Paulo hakarak ita no liu-liu ba imi leitorado no acolitado sira atu moris tuir mak hanesan “Primeiro, buka atu tau confiança iha Maromak. Maromak la buka no la bolu
de’it imi maibé Nia mós sei hamutuk nafatin ho imi. Buka atu tau laran metin ba Nia nebé bolu ona imi no tau imi nia confiança iha Ninia liman. Segundo, buka atu hala’o didiak knaar nebé ohin tau iha imi nia liman no buka atu hadomi knaar ida ne’e”.

Celebração Eucaristia ida ne’e mós sai hanesan celebração ida atu taka ano formativo tinan 2024 iha Seminário Maior Interdiocesano S. Pedro e S. Paulo molok seminarista sira ba passa férias iha ida-idak nia paroquia. Tanba ne’e, Cardeal hatutan iha nia homilia atu seminarista sira precisa hamoris valores no virtude di’ak sira iha sira nia-an. Seminarista sira precisa hametin vida oração. Katak precisa hakiak relação nebé di’ak ho Maromak atu Nia nafatin haburas sira nia vocação.

Molok termina homilia, Cardeal husu ba leitorado no acolitado sira atu liu hosi knaar ida ne’e sira hahu aprende ona moris iha santidade. Liu-liu tau confiança no esperança iha Maromak nebé bolu hodi hadomi knaar nebé sira simu. Ikus liu, ho roman evangelho São João nian iha eucaristia ida ne’e, Cardeal husu atu seminarista sira haré fugura Jesus Cristo nian nudár modelo atu moris tuir. Tanba, “Cristo mak sai ita nia modelo bibiatan di’ak. Bibi atan di’ak mate ba Nia bibi sira”, hatutan Cardeal hodi termina ninia homilia.

Eucaristia ida ne’e participa mós hosi Reitor ISFIT, Pe. Justino Tanec nudár padre concelebrante hamutuk ho padre sira seluk, madres, seminaristas no familía sira seminarista nian.