Dili –ISFIT hala’o abertura ba programa estágio tinan 2024. Abertura ida ne’e hahu ho distribuição carta no cartão estágio ba estudante estágiario sira nebé realiza iha loron 29 fulan outubro tinan 2024 iha salão ISFIT.
Reitor ISFIT, Pe. Justino Tanec haktuir iha nia discurso katak estágio ne’e rasik hola parte iha currículo ISFIT nian no tama iha semestre VII ho crédito 6. Tanba ne’e, Reitor deseja nia esperança ba orientador sira atu bele hola parte ho maneira integral hodi orienta no acompanha estudante estagiário sira hosi hahu estágio to’o remata.
“Ita agradece tanba ita nia parceiro sira sei disponível nafatin atu simu ita no iha tan parceiro foun nebé ita hetan liu hosi estágio ida ne’e. Ita agradece tanba iha instituição lubuk ida nebé simu ita atu aprende no contribui buat ruma ba sociedade no Igreja”, haktuir Pe. Justino.
Molok remata discurso, Reitor representa ISFIT deseja ba estudante estagiário sira hotu boa viagem, bom estudo, boa gestão no bom estágio ba hot-hotu.
Iha sorin seluk, assistente Vice-Reitor I, assunto académico, Sr. Américo da Cruz explica assunto técnico hirak nebé estudante no orientador sira precisa hala’o molok hahu estágio no durante realiza estágio refere. Assitente ne’e mós haktuir katak objetivo hosi estágio ida ne’e mak primeiro atu desenvolve estudante sira nia capacidade académica liu hosi diálogo no serviço social. Segundo atu orienta estudante sira hodi reflete problema atual sira iha área ética, política, economia, cultura no religião iha roman fiar no razão. No ikus liu mak atu forma estudante sira nia carater atu sai ema nebé integrado multidimensionalmente.
Estudante sira nebé sei ba hala’o estágio hamutuk 83 hosi faculdade filosofia. No fatin hirak nebé sira sei ba hala’o estágio mak hanesan Parlamento Nacional, CONTL, Ministério de Justiça, SECOMS, Ministério da Educação (DGAF), Museum da Resistência, CPP Liquiça, MCI, CCLN, UNTL, TIMOR GAP,EP, ADTL, PBI, Colégio são João Paulo II, SEAC, Fundação Carbon Offset Timor, Rede Feto, International Eagle School, IADE, SEESGTV, SEI, PRADET, Arquivo Nacional, Procuradoria Geral República, Tribunal Judicial, STAE Munisipal Dili no ISFIT.
Encontro ida ne’e participa hosi Reitor ISFIT, Docentes orientadores no funcionários assistentes no estudante estagiario sira hotu hosi faculdade filosofia. (Média ISFIT)