ISFIT REALIZA SEMINÁRIO NACIONAL HODI COMEMORA LORON CONSULTA POPULAR

Dili – ISFIT liu hosi Vice-Reitor III, assunto estudantil no cooperação, hamutuk ho senado estudantil organiza seminário nacional hodi comemora loron consulta popular Timor-Leste nian ba dala 25. Seminário nacional ne’e realiza iha loron 28 fulan agosto tinan 2024 iha salão Seminário Maior Interdiocesano São Pedro e São Paulo, Fatumeta.

Tema geral ba Seminário Nacional ida ne’e mak “Povo mak Funu! Povo mak terus! Povo mak manan funu! Povo mak heroi boot, ba ukun rasik-an”. Ho nune’e, ISFIT convida orador principal na’in tolu hodi partilha história no ideia sira kona-ba tópico refere. Orador I, Sr. Grégorio Saldanha ho ninia sub-tema “Libertação da Pátria e do Povo”. Orador II, Sr. Tenente General Lere Anan Timur ho ninia sub-tema “A Cultura da Não Violência dos Timorenses durante a Ocupação e na era da Indenpendência”. Orador III, Prof. Elídio Augosto Guterres ho ninia sub-tema “Diagnóstica Patologia Política TL iha Perspetiva Filosofia Política”.

Reitor ISFIT, Pe. Justino Tanec lori Civitas Académica ISFIT hato’o bemvindos, saudações cordiais e académicas ba orador na’in tolu no ba participante hotu nebé mak participa iha seminário nacional ida ne’e. Reitor mós hato’o nia profundo gratidão ba orador sira tanba bele aceita ISFIT nia convite atu partilha iha seminário ida ne’e hodi celebra vigéssimo quinto aniversário consulta popular.

Iha discurso, Reitor cita encíclica Fratelli Tutti  Papa Francisco nian, iha nebé Papa fo hanoin ba humanidade tomak kona-ba consciência histórica. Iha documento ne’e Papa bolu atenção ba perigo cultura desconstrucionismo. Pe. Justino salienta liafuan Papa Francisco nian katak “caracteristica hosi cultura desconstrucionismo mak ignora história, lakohi aproveita história dos velhos e das velhas, despreza passado totalmente, hateke de’it ba futuro, fiar de’it ba nia promessas no submete de’it ba nia planos. Portanto, cultura ida ne’e rejeita riquezas espiritual no humana nebé transmitido hosi geração ba geração”.

Hosi citação ida ne’e Reitor ISFIT hakarak expressa ba participante sira hotu objetivo hosi seminário nacional ida ne’e. Atu participante sira hotu nebé participa iha seminário ida ne’e bele iha hakarak atu contra cultura ida nebé lori ita ba haluha história. Liu-liu Reitor husu ba participante sira hotu atu labele haluha Papa Francisco nia liafuan iha Fratelli Tutti N⁰ 14 nebé dehan “Povo nebé hewai nia tradição, nia tolera ema atu naok nia klamar”. Hosi ne’e mak participante sira hotu bele aproveita didiak história no conhecimento sira hotu nebé mak orador sira sei partilha liu hosi seminário ida ne’e. Molok termina discurso Reitor mós deseja ba participante sira hotu katak “mai ita halo memória ba passado ho gratidão, moris iha presente ho paixão no hakuak ita nia futuro Timor-Leste ho esperança”.

Depois de termina secção partilha no discusão nian, Senado Estudantil ISFIT mós oferece prémios ba colaborador no manan na’in sira iha atividade académica ISFIT nian nebé mak realiza tiha ona. Seminário ida ne’e la’o ho di’ak no hetan participação máxima hosi Presidente CONECTIL, Pe. António Quenser, Senado Académico no Estudantil, Docente no Funcionário sira ISFIT nian, estudante ISFIT no estudante convidado sira hotu nebé mak hetan convite atu participa iha seminário nacional ida ne’e.