ISFIT ASSINA ACORDO HO BOLSEIRO SIMÃO DE ANDRADE

Dili – ISFIT liu hosi Senado Académico assina acordo ho bolseiro Simão de Andrade Martins nebé mak hanesan alumni no funcionário ida iha ISFIT. Iha biban hanesan, assina mós contrato ho funcionário foun nebé mak sei substitui funcionário bolseiro ne’e nia fatin. Atividade ne’e realiza iha loron 12 fulan agosto tinan 2024 iha sala encontro ISFIT nian.

Bolseiro Simão de Andrade Martins nudár alumni ISFIT ida iha faculdade filosofia no halao mós serviço nudár funcionário assistente administração no finanças iha ISFIT. Bolso estudo refere oferece hosi Universidade Widya Dharma Pontianak, Indonésia. Tuir plano, bolseiro sei ba continua nia estudo hodi hasai nia curso mestrado iha área gestão (Master of Management).

Reitor ISFIT, Pe. Justino Tanec haktuir katak bolseiro Simão nudár 5⁰ bolseiro leigo ISFIT nian. No nia mós hanesan 1⁰ bolseiro hosi Universidade Widya Dharma Pontianak, Indonésia. Ho nune’e, Reitor agradece ba oportunidade ida ne’e liu-liu freires Capuchinhos iha Timor-Leste, tanba hosi sira nia esforço mak ISFIT bele hetan oportunidade bolso estudo ida ne’e. Pe. Justino Tanec husu ba bolseiro atu cuida didiak confiança no responsabilidade nebé ISFIT oferece. Atu nune’e bolseiro ne’e rasik bele ba no fila-fali mai ho compromisso ida de’it katak “de ISFIT, com ISFIT e para ISFIT e todos”.

Bolseiro Simão de Andrade agradece ba ISFIT no orgulho tanba ISFIT bele hili nia atu ba continua estudo iha área refere. Tuir nia, Bolsa ida ne’e la’os sai de’it hanesan oportunidade maibé mós sai hanesan desáfio ida atu nia rasik bele sukat fila-fali nia capacidade intelectual. Bolseiro ne’e mós compromete atu ho limitação no capacidade uitoan nebé iha nia bele esforço atu responsabiliza ba confiança nebé ISFIT oferece. Ho nune’e nia husu nafatin ba parte hot-hotu atu apoio nia liu hosi oração.

Acordo ida ne’e assina entre bolseiro ho ISFIT, no hirak nebé sai testemunha ba acordo ida ne’e mak hosi parte senado académico ISFIT nian ho família sira bolseiro nian. Iha momento hanesan, ISFIT mós assina contrato ho funcionário foun Maria Elisa Brito nebé sei subtitui hikas funcionário Simão de Andrade nia fatin. (Média ISFIT)