Dili – Estudante ISFIT participa iha atividade discussão temática nebé realiza hosi Centro Nacional Chega (CNC). Atividade ne’e realiza iha loron 12 fulan julho tinan 2024, iha salão ISFIT.
Discussão tématica ida ne’e Centro Nacional Chega realiza ho objetivo ida atu lori estudante sira ba compreende história iha livro relatório Chega!, liu-liu iha capítulo V nebé ko’alia kona-ba “Rezisténsia: Estrutura no Estratégia”. Além de ida ne’e bele sai mós hanesan meio ida atu cria interação social hosi ema ida ba ema seluk no sai mós hanesan dalan ida atu lori estudante sira ba hala’o pesquisa.
Vice-Reitor-II ISFIT nian, Pe. Francisco da Costa, representa Reitor ISFIT hato’o agradecimento ba CNC nebé hola iniciativa atu hala’o encontro ou discussão kona-ba relatório Chega iha ISFIT. Pe. Francisco mós husu ba estudante sira nebé mak hanesan academista atu aproveita didiak discussão ida ne’e hodi aprende hosi heroi no aswain sira nebé halo tiha ona história.
“No depois de ita aprende ita mós koko atu hakerek historia hirak ne’e. Ita aprende liu hosi ema sira nebé mak too ohin loron sei moris no ita aprende liu tan hosi discussão temática ida nebé organiza hosi CNC. Espera hosi discussão ida ne’e bele loke liu tan ita nia horizonte matenek nian, loke liu tan ita nia hanoin atu compreende hodi transmite liu tan ba ita nia maun alin sira”, tenik Pe. Francisco iha nia discurso abertura nian.
Diretor divisão Eduacação no Formação-CNC, Sr. Alexandre Ornay Pinto expressa nia sentimento ksolok tanba ISFIT bele simu CNC atu realiza atividade importante ida ne’e. Diretor ne’e mós haktuir liu tan katak CNC nia missão ida mak atu preserva história memória passado nian, liu-liu hosi tinan 1975 too mai 1999. Tuir diretor ne’e katak ita precisa duni atu preserva história sira ne’e atu sai hanesan evidência ida katak ukun-an ne’e resultado coletiva laos resultado ema ida nian. Tanba ne’e, CNC sai hanesan fatin atu preserva no atu coleta memória hirak ne’e hotu.
Tópico ba discussão temática ida ne’e mak “Relatóriu CHEGA! Kapítulu V Rezisténsia: Estrutura no Estratégia”. Apresentador principal ba discussão temática ida ne’e mak Sr. Nug Katjasungkana. Sira nebé sai hanesan comentador mak hanesan Eis comisário nacional-CAVR, Sr. Jacinto Alves nebé comenta kona-ba “Reflesaun kritika ba perpetiva, aprosimasaun, metodologia no fonte sira ba elaborasaun Relatório Chega!” ho Docente UNTL, Sr. DR. Antero Bendito nebé comenta kona-ba “Partisipasaun no importansia movimentu klandestina iha luta libertasaun”.
Alem de atividade discussão temática, equipa CNC sira mós halo socialização kona-ba livro no documento sira nebé mak durante ne’e CNC consegue recolha no preserva ona iha Biblioteca, Arquivo no Museum CNC nian. Discussão ida ne’e hetan participação máxima no ativamente hosi estudante sira ISFIT nian. (Média ISFIT)