ISFIT CELEBRA DIES NATALIS

Dili – ISFIT celebra dies natalis ba dala-11. Celebração ida ne’e hahu uluk ho missa eucaristia nebé celebra iha capela Seminário MAior Interdiocesano São Pedro e São Paulo (SPEPAL). Depois de missa realiza mós atividade hanesan seminário nacional, exposição hahan tradicional no animação musical.

Durante celebração eucaristia Frei Isidoros Joseph Jawa, Vice-reitor I, assunto académico ISFIT nian explica katak celebração ba dala-11 ne’e lori liu ita atu iha espírito gratidão no orgulho tanba bele hola parte iha ISFIT. ISFIT hanesan única instituição académica ida nebé contribui iha formação académica ba candidato na’i lulik sira hosi diocese tolu   no mós hosi congregação no ordem religioso sira. Vice-Reitor I ne’e mós husu atu ita iha espírito responsabilidade ba ISFIT, katak ita sira nebé oras ne’e daudaun iha ISFIT, ita hot-hotu iha responsabilidade ba ISFIT nia di’ak.

Celebração eucaristia hotu tiha continua kedas ho seminário nacional nebé realiza iha salão ISFIT. Tópico nebé partilha iha seminário refere ko’alia kona-ba “Soberania Territorial: A legitimidade da soberania do povo de Oe-cusse”. Orador principal ba seminário nacional ne’e mak Sr. DR. Roberto Soares nebé oras ne’e daudaun haknaar-an nu’udar assistente especial para o chefe negociador e chefe da equipa técnica das negociações no âmbito de delimitação das fronteiras terrestres da RDTL. Durante seminário, Sr. Roberto relata detalhadamente kona-ba processo tomak nebé mak durante ne’e sira halo iha fronteira terrestre entre Timor-Leste ho Indonésia. Sr. Roberto mós lori gabinete fronteiras terrestres e marítimas nia naran hato’o parabéns ba ISFIT nebé celebra aniversário ba dala-11.

Remata tiha seminário nacional ida ne’e continua kedas ho atividade sira hanesan exposição hahan tradicional no animação musical nebé prepara hosi estudante sira faculdade filosofia no teologia nian. Assistente Vice-Reitor III, assunto estudantil, Ir. Junaro Agapito hato’o agradecimento ba parte hot-hotu nebé colabora ona hodi realiza cerimónia principal ida ne’e. No nia husu mós ba estudante hot-hotu atu continua colabora nafatin iha atividade sira hotu nebé sei realiza iha tempo tuir mai. (Média ISFIT)