CNC I.P ORGANIZA “CHEGA! CAMPUS DAY” IHA ISFIT

Dili – Estudante ISFIT nain 35 participa iha CHEGA CAMPUS DAY nebé organiza husi Chega Young Ambassador iha loron 14 fulan março tinan 2024.

Atividade ida ne’e nu’udar programa ida hosi Centro Nacional Chega nebé organiza hosi chega young ambassador ho objetivo atu socializa no partilha história sira Timor-Leste nian, liu-liu hahu husi tinan 1974 too 1999. Atividade ida  ne’e halao ho tema “Povo ida nebé mak laiha memória, maka sei laiha futuru, tan ne’e mai hamutuk ita koñese ita nia memória pasadu 1974-1999”.

Pr. Elídio Augusto Guterres hanesan Vice-Reitor III, assunto estudantil representa reitor no senado ISFIT tomak hato’o bemvindo no sucesso ba programa ida ne’e. Molok atu taka discurso, Vice-Reitor III ne’e mós agradece no aprecia ba programa ida ne’e no husu atu estudante sira aproveita didiak programa ida ne’e to’o remata. Iha momento hanesan, Diretor Executivo CNC I.P Sr. Hugo Maria Fernandes mós agradece ba biban no espaço nebé mak ISFIT oferece ba Chega young ambassador atu realiza evento ida ne’e.

Atividade sira nebé realiza iha evento ida ne’e mak hanesan socialização no exposição. Socializa história atu aumenta estudante sira nia conhecimento no halo exposição ba documento no arquivo hirak nebé conserva iha Centro Nacional Chega. (Média ISFIT)