ISFIT Realiza Atividade hodi Celebra Dies Natalis ba dala-IX, MESCC Louva ISFIT

DILI (Média ISFIT) – Instituto Superior de Filosofia e de Teologia (ISFIT) Dom Jaime Garcia Goulart Fatumeta-Dili, Tersa-Feira (14/06) ne’e, realisa atividade Liga ISFIT, Debate Científico no Atividade Reflorestação ne’ebé ho objetivo atu selebra Dies Natalis ISFIT nian ba dala-IX.

Reitor Instituto Superior de Filosofia e de Teologia (ISFIT); Pe. Justino Tanec, hateten, Tuir loloos evento Dies Natalis ne’e comemora ona iha dia 10 de Maio maibe tamba ho questão balu ne’ebé ISFIT precisa resolve nune’e adia fali mai dia 14 de Junho.

“Hanesan ita hatene katak iha dia 10 de Maio ne’e ita labele realisa evento Extra curicular ne’e ho razão tamba ita foin remata graduação no ita precisa recupera fali Matéria sira ne’ebé seidauk prenche critério ba exame semestral nian, tamba ne’e ISFIT decide atu hala’o abertura Dies Natalis 10 de maio nian iha fali dia 14 de junho ne’e ba oin ho atividade sira ne’ebe foca ba vida Desportiva, intelectual no natureza nian,” afirma Pe. Justino Tanec, durante iha nia discurço ba abertura atividade extra curicular nian, iha salão ISFIT-Fatumeta, Dili.

Nia dehan, atividade sira ne’ebe realiza ne’e la’os ho objetivu atu selebra de’it Dies Natalis ISFIT nian, maibé atu bele descobre no promove mos potência hirak ne’ebe estudante ida-idak iha liu-liu talento no intelectual.

“Ha’u hanoin, husi competição sira ne’ebe diversa ita bele hetan no descobre mos ema sira ne’ebe compatível iha área ida-idak hodi nune’e ba oin ita buka oinsa atu promove mos sira iha nível nacional,” akresenta nia.

Portanto, husi atividade sira ne’e hanorin mos ita, primeiro mak serbisu hamutuk iha equipa atu oinsa bele esforço aan hodi realisa atividade sira, da-ruak mak unidade na diversidade katak la’os hotu-hotu depende de’it ba ema ida maibé atu hotu-hotu bele hola parte mos iha serviço ne’ebé hanesan no ikus liu mak ita aprende iha disciplina no aprende husi derrota sira mos, basá sucesso sempre liu husi derrota mos.

Entretanto, iha biban hanesan, representante Ministério Ensino Superior Ciência no Cultura (MESCC), Diretor Nacional Curículo Ensino Superior, Luis Aparício Guteres, hato’o apreciação hodi louva ISFIT tamba durante ne’e bele produs ona estudante lubuk ida ne’ebe ho qualidade di’ak iha área oi-oin no ba da-huluk realiza evento Dies Natalis iha tinan ne’e.

“Entre Ensino Superior 18 iha Timor ne’ebe hetan acreditação ne’e ida husi sira ne’ebe ami la dúvida, basá nia produs ema barak ho qualidade oi-oin no produs jovem ne’ebe atu sai fruto ida ne’ebe diak iha aban bainrua nian mak ISFIT ne’e rasik, ami louva tebes ho ISFIT nia existência no ami hakarak hato’o parabéns mos ba selebração aniversário ISFIT nian ba dala-IX ne’e no fiar katak ba oin ISFIT sei sai exemplo mos ba Universidade sira seluk,” dehan representante MESCC ne’e.

Média-ISFIT

Cornélio Mota