𝐀𝐍Ú𝐍𝐒𝐈𝐔 𝐑𝐄𝐒𝐔𝐋𝐓𝐀𝐃𝐔 𝐏𝐑𝐎𝐕𝐈𝐒Ó𝐑𝐈𝐔 𝐇𝐔𝐒𝐈 𝐀𝐕𝐀𝐋𝐈𝐀𝐒𝐀𝐔𝐍 𝐀𝐊𝐑𝐄𝐃𝐈𝐓𝐀𝐒𝐀𝐔𝐍 𝐈𝐍𝐒𝐓𝐈𝐓𝐔𝐒𝐈𝐎𝐍𝐀𝐋 𝐀𝐍𝐀𝐀𝐀

Diretór Ezekutivu, Doutór Nilton Diamantino Paiva Mau liu-hosi ninia liafuan bem-vindo hatete prosesu tomak ne’ebé maka ANAAA hala’o durante avaliasaun no akreditasaun maka formasaun no kapasitasaun ba pesoal servisu garantia kualidade interna (IQA), akompañiamentu durante preparasaun relatóriu auto avaliasaun, konvida avaliadór nasional no international, avaliasaun, moderasaun no apresenta resultadu ba membrus konsellu diretivu hodi fo apresiasaun no aprovasaun molok distribui ba instituisaun ensinu superior sira. Nune’e resultadu avaliasaun no akreditasaun ida-ne’e sei hanesan resultadu provisóriu tamba ne’e ami hakarak husu nafatin ba instituisaun ensinu superior sira ne’ebé maka hakarak halo rekursu, bele halo ho durasaun loron sanolu resin-lima (15) husi loron distribuisaun resultadu provisóriu tuir lei haruka.

Presidenti Konsellu Diretivu, Doutór Xisto Martins liu-hosi ninia breves palavras nafatin fo apresiasaun ba servisu hotu ne’ebé maka ANAAA hala’o ona inklui partisipasaun husi avaliador nasional no internasional inklui mos instituisaun ensinu superior sira.

Sua Exelénsia Ministru Ensinu Superior, Siénsia no Kultura, Doutór José Honorio da Costa Pereira Jerónimo, liu-hosi ninia diskursu hatete prosesu avaliasaun no akreditasaun ne’ebé maka ANAAA halo regirosu tebes, tamba tuir politika IX governu konstitusiónal nian nafatin tau atensaun makas ba IESA sira hotu atu bele atinzi kualidade edukasaun ensinu superior ne’ebé diak liu iha futuru. Liu-hosi biban ida-ne’e sua exelénsia ministru ensinu superior, siénsia no kultura nafatin fo apresiasaun ba ANAAA, avaliador nasional i internasional no instituisaun ensinu superior sira nia kolaborasaun no servisu tomak ne’ebé maka kontribui ona ba prosesu avaliasaun no akreditasaun kada tinan. (Fontes Media Anaaa)