ISFIT REALIZA CERIMÓNIA ASSINA ESTATUTO NO MOU

Dili – ISFIT realiza cerimónia assina Estatuto ba período 2024-2028 hosi D. Norberto do Amaral, Bispo Diocese Maliana no Presidente CET. Iha cerimónia ne’e assina mós Memorandum Of Understanding (MoU) entre ISFIT ho Instituto São João de Brito (ISJB). Cerimónia refere hala’o iha loron 24 fulan junho tinan 2024, iha salão ISFIT.

Reitor ISFIT, Pe. Justino Tanec iha ninia introdução discurso nian nia hato’o bem-vindo no saudações cordiais e académicas ba ema hotu nebé participa iha cerimónia importante ida ne’e. Kona-ba asinatura Estatuto ISFIT ba período 2024-2028, Pe. Justino Exlica katak “Estatuto anterior vigora desde 2017, aprovado hosi D. Basílio do Nascimento (Maktoban), presidente CET iha momento nebá, no registo iha notariado. Tuir loloos cada 5 anos halo revisão, maibé tanba 2022 sei iha covid-19 nia laran no mós iha mudança estrutura ISFIT nian. Tanba ne’e revisão do estatuto refere foin realiza iha 2023 no finaliza iha 2024. No ohin sei hetan aprovação hosi D. Norberto do Amaral”.

Reitor ISFIT mós explica kona ba nota do entendimento entre ISFIT ho ISJB. Tuir Reitor ISFIT, molok atu assina nota do entendimento ida ne’e ISFIT ho ISJB halo uluk ona visita sira ho objetivo atu troca impressões no inicia processo cooperação, no ohin ho graça Maromak nian Instituto rua ne’e bele too acordo ida  atu celebra nota de entendimento. Reitor ISFIT comenta liu tan katak cooperação ida ne’e la sees hosi três pilares do ensino superior hanesan: ensino aprendizagem, pesquisa no serviço comunitário. Maibé buat nebé Instituto rua hakarak específica iha acordo ida ne’e mak hanesan: docência, sistema bibliotecaria, formação de caracter e espiritual no pesquisa interdisciplinar.

Iha parte hanesan, Pe. Isaías Abilio Caldas, SJ, hanesan Reitor ISJB explica katak espírito ida nebé sei guia ita liu hosi acordo ida ne’e mak espírito atu completa malu. Tuir Reitor ISJB “em vez de ita compete malu, maibé ita nu’udar instituição católica ita precisa sai exemplo katak ita ne’e hala’o missão ida de’it no participa iha missão igreja nian. Igreja ida nebé nu’udar mãe e mestra atu forma foinsae sira. Colaboração ida ne’e atu eleva qualidade da educação no atu lori educação ba oin”.

“Ha’u hanoin ita nia colaboração ida ne’e pelo menos atu hatete katak ita la compete. Maibé ita hakarak hatuun moru sira nebé separa ita, harí ponte atu nune’e ita ida-idak nebé ho ita ninia habilidades no mós ita nia fraqueza sira hakarak sai construtor do Reino de Deus iha Timor. No ita nia participação iha construção do Reino de Deus ne’e liu hosi educação ida nebé ajuda ita nia estudante atu lori sira nia an ne’e loloos”, hatutan Reitor ISJB iha ninia discurso.

D. Norberto do Amaral, Bispo Diocese Maliana no Presidente CET, comenta katak Estatuto ne’e hanesan meios ida atu bele ajuda ita hodi halo serviço ho didiak. No assina nota do entendimento ne’e hanesan cordenação entre Instituto rua nian. Tanba ne’e, D. Norberto, espera atu instituto rua bele cordena didiak hodi completa malu no liu-liu bele serviço didiak tuir buat nebé Santo Padre ko’alia kona-ba Sinodalidade, katak ita lao hamutuk no fo liman ba malu, liu-liu ba ita nia estudante sira nia di’ak.

Molok termina cerimónia refere ISFIT mós destribui certificado de apreciação ba equipa revisão estatuto. Equipa ida ne’e composto hosi Pe. Domingos Alves, Pe. Mateus Afonso, Pe. Mouzinho Pereira Lopes, Pe. José Filipe de Jesus Pereira de Araujo no Pe. Deonisio Felismino D. Guterres Soares.

Depois de distribuição certificado refere, ISFIT aproveita kedas momento histórico ida ne’e hodi kuda ai-oan simbólicamente iha jardim exterior. Pe. Justino Tanec haktuir mós katak, Senado Académico ISFIT propõe jardim interior ne’e hanaran S. Francisco de Assis no iha jardim exterior hanaran jardim Papa Francisco.

Cerimónia ida ne’e hetan participação máxima hosi parte hot-hotu hanesan CET, CONECTIL, Reitor ISJB ho ninia Senado Académico, Reitor ISFIT ho ninia Senado Académico, Funcionários ISFIT no representante estudante sira. (Média ISFIT)